Meksika prezidenti Klaudiya Şeynbaum minlərlə insanın qatıldığı mitinqdə ABŞ-ı qarşılıqlı hörmət və dialoqa çağırıb.

“İki sahil” xəbər verir ki, ABŞ prezidenti Donald Trampın Meksikaya 25% əlavə gömrük rüsumlarını bir ay müddətinə dayandırmasından sonra Şeynbaum paytaxt Mexikoda Zokalo meydanında minlərlə insana müraciət edib: "Biz Meksika ilə ABŞ arasında münasibətlərin hər zaman qarşılıqlı hörmət və dialoq yolu ilə möhkəmlənəcəyinə inanırıq. Amerika xalqına deyirəm ki, bizim onlara zərər vermək niyyətimiz yoxdur, heç vaxt olmayacaq və biz onlarla bütün sahələrdə əməkdaşlıq etmək əzmindəyik".

"Biz ABŞ-la dialoqdan hər zaman xoşbəxtik" deyən Şeynbaum əlavə edib: "Meksika humanitar səbəblərə görə fentanilin ABŞ-dakı gənclərə çatmasının qarşısını almaq üçün əməkdaşlığı davam etdirəcək. Biz bu dərmanın təkcə ABŞ-da deyil, dünyanın heç bir yerində və ya Meksikada gənclərə çatmasını istəmirik".

Şeynbaum, son 30 ildə ABŞ ilə iki ticarət müqaviləsi həyata keçirdiklərini ifadə edərək, "Təklifimiz təkcə Şimali Amerikanın deyil, bütün qitənin iqtisadi və ticarət inteqrasiyasını təmin etməkdir. Biz bütün xalqların azadlığına, müstəqilliyinə və suverenliyinə hörmət edərək dünyanın ən güclü bölgəsi olmağı hədəfləyirik", - deyə bildirib.

ABŞ-la 3180 kilometr sərhədi paylaşdıqlarını xatırladan Şeynbaum, iki ölkə arasında ticarət, iqtisadi və dostluq əlaqələrinin davam etdiyini, ortaq mədəniyyət töhfələrinin də vacib olduğunu qeyd edib.

Məhərrəm Ağalaroğlu, “İki sahil”