Ölkənin ərazi bütövlüyünün və suverenliyinin tam bərpası fonunda prokurorluq orqanlarının qarşısında yeni çağırışlar meydana çıxır. “Konstitusiya və Suverenlik İli” çərçivəsində prokurorluğun funksiyaları genişlənir və dövlət təhlükəsizliyinin qorunmasında rolu daha da artır.

“İki sahil” xəbər verir ki, bu sözləri Baş prokuror Kamran Əliyev Milli Məclisin mayın 1-də keçirilən plenar iclasında çıxışı zamanı söyləyib.

Baş prokuror qeyd edib ki, dövlətin daxili və xarici təhdidlərdən müdafiəsi, antiterror tədbirlərinin hüquqi çərçivədə dəstəklənməsi, habelə müstəqil və güclü məhkəmə sisteminə dəstək göstərmək bu orqanın yeni dövrdə əsas vəzifələrindəndir. O, bununla yanaşı, Qarabağda və Şərqi Zəngəzurda bərpa-quruculuq işlərinin prokurorluq nəzarəti altında qanunauyğun aparılmasının da önəmli olduğunu vurğulayıb.

Kamran Əliyev, həmçinin cinayətkarlığın bütün formalarına qarşı mübarizənin gücləndirilməsi, o cümlədən kölgə iqtisadiyyatı və korrupsiyaya qarşı sərt tədbirlərin davam etdiriləcəyi ilə bağlı qətiyyətli mövqe sərgiləyib. Qeyd edib ki, bu yanaşma dövlətin hüquqi dayaqlarının möhkəmləndirilməsi baxımından strateji əhəmiyyət daşıyır.