Ermənistan ordusu hərbi əməliyyatlardan kənar itkilərinin sayını gizlətməkdə davam edir. Daha dəqiq desək, həmin rəqəmlər erməni sosiumunda kəskin narazılıq yarada bilər və hakimiyyət bundan çəkinir, hər vəchlə statistikanı gizlətməyə çalışır. Demək olar ki, üç dövlət qurumu – Müdafiə Nazirliyi, İstintaq Komitəsi və Hərbi Prokurorluq, əsasən, hərbi əməliyyatlardan kənar baş vermiş ölümlərin saylarını gizlətməklə həm ictimai qiyamın qarşısını almağa cəhd göstərir, həm də bu rəqəmlərin qarşı tərəfə - yəni Azərbaycanda aşkar olunmaması üçün necə deyərlər, özlərini dağa-daşa çırpırlar. Lakin buna baxmayaraq, faktlar sızır və məlumdur ki, erməni silahlı qüvvələrində özünüməhvetmə prosesi vüsət alıb. Əgər nəzərə alsaq ki, müasir informasiya texnologiyaları dövründə yaşayırıq və belə xəbərləri gizlətmək qeyri-mümkündür, bu zaman statistikanın sirr olaraq qalması mümkünlüyü də minimumdur.

Ermənistanın Vatikandakı keçmiş səfiri Mikael Minasyanın 2020-ci il noyabrın 14-də müharibə itkilərinin sayı ilə bağlı dərc etdirdiyi siyahı bu mövzuda böyük ictimai reaksiyaya səbəb oldu. Onun məlumatına görə, həmin günə olan məlumata görə, 2250 hərbi qulluqçu ölüb, yarılıb, 1400-ü ölüb, hələ eksqumasiya olunmayıb, 1100-ü itkin düşüb. Yəni, həmin mənbəyə görə, məhv edilənlərin ümumi sayı 4750 nəfər olub. Rəsmi mənbələr açıqlanan rəqəmləri təsdiqləmədən itkilərlə bağlı başqa məlumat verməkdən çəkinib. Əvəzində itkilərlə bağlı çoxsaylı, ziddiyyətli rəqəmlər təqdim edildi.

Bundan başqa, müxtəlif jurnalist sorğularına cavab olaraq Ermənistan Müdafiə Nazirliyi 2021-ci il yanvarın 5-də hərbi əməliyyatlar zamanı məhv edilən və ya itkin düşən hərbçilərin həqiqi sayının dövlət sirri olduğunu açıqlayıb. Müharibə itkiləri ilə bağlı ziddiyyətli rəsmi nəşrlərdə aşağıdakı mənzərə var. 20 yanvar 2021-ci ildə Ermənistan parlamentində sual-cavab iclasında baş nazirin müavini Tiqran Avinyan müharibə zamanı ölənlərin sayı ilə bağlı dərc olunan müxtəlif rəqəmlərdən danışıb. “Hazırda bizdə 3439 cəsəd var, onlardan 766-nın şəxsiyyəti hələlik müəyyən edilməyib, yəni onların DNT-sinin identifikasiyası prosesi gedir. Yekun siyahı açıqlanacaq. İtkin düşənlər də var, mən konkret rəqəm açıqlamaq istəmirəm, lakin itkilərin sayı 4 mini keçməyəcək”, - deyə Avinyan bildirib.

14 aprel 2021-ci ildə Ermənistan baş naziri Nikol Paşinyan parlamentdə deputat Karapet Mxçyanın sualını cavablandırarkən bildirib: “Hazırda ölüm şəhadətnaməsi ilə təsdiqlənmiş 3621 itki var, 321 nəfər itkin düşüb, 201 nəfərin DNT analizi aparılır. Bizdə konkret qohumlarla eyniləşdirilən 100-dən çox identifikasiya edilmiş cəsəd var, lakin qohumlar müxtəlif səbəblərdən hələ də bu faktı qəbul etməkdən imtina edirlər. Bir çox soydaşlarımız qohumlarının sağ olduğuna inanırlar, əsirdirlər, DNT testlərinə etibar etməyən ailələr var”. O əlavə edib ki, son ölənlərin sayı 4000-ə yaxın olacaq. “4000-ə yaxındır, plus-minus 50”, - deyə Paşinyan bildirib.

2021-ci il iyunun 7-də Ermənistanın baş naziri vəzifəsini icra edən Nikol Paşinyan Armavir vilayətinin Geğakert icmasında 44 günlük müharibə nəticəsində erməni tərəfinin rəsmən təsdiq etdiyi itkilərin sayının 3700-ə yaxın olduğunu açıqlayıb. Eyni zamanda o, itkilərin sayının 4000-ə çata biləcəyini deyib.

2021-ci il avqustun 24-də Nikol Paşinyan parlament tribunasından Ermənistan tərəfində 44 günlük müharibənin itkilərinin sayının 3773 nəfər olduğunu, 243 hərbçinin yerinin məlum olmadığını bəyan edib.

2021-ci il avqustun 26-da, iki gün fərqlə Nikol Paşinyan parlamentdə elan etdi: “Hazırda 44 günlük müharibə nəticəsində Ermənistan tərəfində itkilərin sayı 3777 nəfərdir”. O, həmçinin bildirib ki, 243 nəfərin harada olduğu məlum deyil. O, iki gündə dərc edilən say fərqini bu müddət ərzində DNT identifikasiyalarının olması ilə izah edib. 2022-ci il yanvarın 19-da Ermənistan İstintaq Komitəsi bildirib ki, Ermənistan tərəfindən itkilərin ümumi sayı 3,809 nəfərdir.

2022-ci il fevralın 10-da parlamentdə hökumətlə sual-cavab iclasında Paşinyan bəyan edib ki, 44 günlük müharibə zamanı erməni tərəfinin itkilərinin sayı 3812 nəfər olub, 217 nəfərin taleyi naməlum olaraq qalır.

Ermənistan hakimiyyəti niyə itkilərin adlarını açıqlamaqdan yayınır? Çünki həmin siyahıda hər kəs öz qohumunun adını görə bilər və ya adının yoxluğunu qeyd edə bilər. Belə olan halda qurbanların real sayı çox tezliklə açıqlana bilər ki, bu da Nikol Paşinyanın hakimiyyətdən yapışmaq planlarına heç bir şəkildə uyğun gəlmir.