Almaniyanın daxili işlər naziri Aleksander Dobrindt Fransadakı küçə toqquşmalarının Almaniya ərazisinə keçə biləcəyindən narahatlığını ifadə edib. O, həmçinin iğtişaşların sol radikallar və miqrant qruplaşmalarının radikal əhval-ruhiyyəli nümayəndələrinin alyansı tərəfindən əlaqələndirildiyini bəyan edib.

“İki sahil” xəbər verir ki, bu barədə "Bild" məlumat yayıb.

"Küçələri döyüş meydanına çevirənlər, polislərə hücum edənlər təhsilin yaxşılaşdırılması qayğısına qalmırlar — onlar azad cəmiyyətə və bizim həyat tərzimizə qarşı silahlı mübarizə aparırlar", — deyə Dobrindt bildirib.

Bununla yanaşı, Almaniyanın DİN rəhbəri ölkənin siyasi qüvvələrini etirazların strukturunu açıq şəkildə etiraf etməyə çağırıb: "Demokratik sistemə qarşı birgə mübarizə üçün küçələrdə sol ekstremistlərin və miqrant mühitinin birləşdiyini açıq şəkildə bəyan etməyən şəxs sadəcə vəziyyəti anlamır".

Almaniya DİN-də narahatlığa həm də yerli siyasətçilərdən bəzilərinin qonşu ölkədəki hadisələrə reaksiyası səbəb olub. Xüsusilə, Sol Partiyanın həmsədri İnes Şverdtner daha əvvəl Fransadakı etirazları müsbət qiymətləndirərək onları "müqavimət nümunəsi" adlandırmışdı.