Rusiya prezidentinin mətbuat katibi Dmitri Peskov Britaniyanın “Financial Times” qəzetinin Rusiya və Ukraynanın enerji infrastrukturu obyektlərinə qarşılıqlı hücumların dayandırılması ilə bağlı məsləhətləşmələr aparması barədə məlumatını şərh edib.

“İki sahil” “Kommersant”a istinadla xəbər verir ki, o, bildirib ki, indi hətta nüfuzlu nəşrlər də yalandan çəkinmir.

“İndi bir çox yalanlar var ki, onlar reallığa çevrilir. Hətta mötəbər nəşrlər belə bundan çəkinmir”, - deyə Dmitri Peskov bildirib. Eyni zamanda o, FT materialının Ukrayna qoşunlarının Kursk vilayətinin bir hissəsini işğal etdiyi müddətdə Rusiyanın danışıqlara getməyəcəyini bildirən hissəsini təsdiqləyib: “Bu, prezidentin sülh təşəbbüsünün əsas şərtidir. Bəli, Rusiya ərazilərindən çəkilməlidirlər. Həm də yeni bölgələrdən.”

Xatırladaq ki, FT-nin məlumatına görə, Qətər dialoqda vasitəçi kimi çıxış edir. Yüksək rütbəli Ukrayna rəsmisi qəzetə bildirib ki, Moskva və Kiyev son bir neçə həftə ərzində artıq bir-birinin enerji infrastrukturuna hücumların tezliyini azaldıb.