Müzəffər Azərbaycan Ordusunun Hadrut qəsəbəsini, Çaylı, Yuxarı Güzlək, Gorazıllı, Qışlaq, Qaracallı, Əfəndilər, Süleymanlı, Sur kəndlərini işğaldan azad etməsi münasibətilə  Azərbaycan xalqına müraciət edən, «CNN İnternational» televiziyasının «THE CONNECT  WORLD» verilişinə, «Sky News» kanalına müsahibə verən Prezident İlham Əliyevin vurğuladığı kimi, əsgər və zabitlərimiz döyüş tapşırıqlarını şərəflə yerinə yetirir, strateji yüksəkliklərdə bayraqlarımızı qaldıraraq, düşmən üzərində tam qələbəyə yaxınlaşırlar.

Sentyabrın 27-dən etibarən düşmənin 16 komanda məntəqəsi də daxil olmaqla xeyli canlı qüvvəsi,  hərbi sursatı, döyüş texnikası  məhv edilmiş və qənimət götürülmüşdür.«Düşmən panikadadır, düşmən isterikaya qapılıb. Düşmən ölkənin rəhbərliyi tamamilə özünü itirmiş vəziyyətdədir. Müxtəlif ölkələrə, müxtəlif ölkələrin dövlət-hökumət başçılarına müntəzəm olaraq zəng edir, dəfələrlə, gündə bir neçə dəfə yardım istəyir, imdad diləyir, yalvarır. Onların ayağının altına yıxılır» söyləyən Prezident İlham Əliyev bildirir ki,  müharibənin dayandırılmasının yeganə yolu düşmənin torpaqlarımızdan çıxmasıdır.  Dövlət başçımız eyni zamanda bildirir ki,  bütün cəbhəboyu gedən döyüşlərdə iradəsini göstərən Azərbaycan   haqq yolundan dönməyəcək, torpaqlarımız işğaldan azad olunacaq, ərazi bütövlüyümüz bərpa ediləcək. Azərbaycanın sonuncu şərti budur: «Biz öz torpaqlarımızı istəyirik. Çıxın gedin bizim torpağımızdan, rədd olun bizim torpağımızdan! Gedin öz ölkənizdə yaşayın. Amma biz torpağımızı geri alacağıq. Ona görə bu tarixi şansı onlar qaçırmamalıdır.»

Amma  Ermənistan hələ də  işğalçılıq siyasətini davam etdirir. Dövlət başçımızın dəfələrlə qeyd etdiyi kimi, mülki əhalini hədəfə almayan Azərbaycanın əksinə olaraq məğlubiyyətə  uğrayan erməni silahlıları təmas xəttindən çox-çox uzaqlarda yerləşən  bölgələrimizi atəşə tutur.  Düşmən tərəfindən intensiv  atəşə məruz qalan   Ağdamda, Füzulidə, Tərtərdə, Mingəçevirdə, Naftalanda  yaşayış evləri də daxil olmaqla  məktəblər, bağçalar,  evlər,   sosial obyektlər dağıdılıb. Mülki əhali arasında  ölənlər var. «Çünki bizim müharibəmiz mülki vətəndaşlarla deyil. Ermənistandan fərqli olaraq, biz mülki vətəndaşları atəşə tutmuruq…Ona görə mən Azərbaycan xalqına üz tutub deyirəm, biz torpaqlarımızı geri alacağıq» söyləyən Prezident İlham Əliyev  onu da bildirir ki, biz nəyi nə vaxt edəcəyimizi yaxşı bilirik.

Çarəsiz qalaraq havadarlarından yardım istəyən, onlara yalvaran, çıxış yolu kimi  Kremlə  müraciət edən, Moskvada Azərbaycan- Rusiya-Ermənistan xarici işlər nazirlərinin  iştirakı ilə aparılan   üçtərəfli danışıqlarda yenə də məkrli siyasət yeridərək guya  humanitar atəşkəsə razı olduğunu bildirən işğalçı  az müddətdən sonra rəzilliyini, qəddarlığını, vədinə sadiq qalmadığını gecəyarısı  Gəncəyə raket zərbələri endirməklə bildirdi. Status-kvonun, təmas xəttinin ləğv olunmasını özünün məhvi hesab edən  Ermənistanın Azərbaycanın mülki əhalisinə qarşı soyqırımı  erməni vandalizminin  növbəti  hiyləsidir. Bu hiyləgər gedişlərdən biri də  Ermənistanın yaydığı  Türkiyənin  Azərbaycana hərbi dəstəyi ilə bağlı yalanlarıdır.

Müxtəlif telekanallara müsahibəsində də Ermənistanın  yalanlarının əsassız olduğunu diqqətə çatdıran dövlət başçımız İlham Əliyev Türkiyə –Azərbaycan qardaşlığının sarsılmazlığından bəhs edərək, dost ölkənin  Azərbaycana göstərdiyi  mənəvi dəstəyi yüksək qiymətləndirir. ATƏT-in Minsk qrupunun həmsədr dövlətlərinin   Fransa, Amerika Birləşmiş Ştatları və Rusiyanın münaqişədə tutduğu birtərəfli mövqe  isə ikili standartların təzahürüdür. Azərbaycanın ikinci böyük şəhəri olan Gəncəni dəfələrlə atəşə məruz qoyan Ermənistanın  vandallığına  münasibət bildirməyən «üçlüyün» mülki əhalinin qətlə yetirilməsini sükutla qarşılaması işğalçıya açıq-aşkar dəstəkdir.

Gecə saatlarında  şəhəri atəşə tutan ermənilərin hədəfə aldığı   çoxmənzilli yaşayış binasının dağıdılması nəticəsində  mülki əhali arasında ölən və yaralananlar var.  Erməni vəhşiliyinin qurbanları arasında  uşaqların və qadınların olması Xocalı soyqırımını  törədən ermənilərin vəhşiliyini bir daha təsdiqlədi.  Çox təəssüf ki, Xocalı soyqırımını törədən Ermənistanın qəddarlığını səssizcə müşahidə edən, faşist xislətli ermənilərə təsir və təzyiq göstərməyən  qüdrətli dövlətlər Gəncə hadisələrinə də biganə yanaşırlar.  Otuz ildir torpaqları Ermənistanın işğalı altında qalan   Azərbaycanın haqq səsini eşitməyən,  qəbul etdikləri  qətnamələrin icra mexanizmi, taleyi ilə maraqlanmayan erməni havadarları indi xilaskar cildinə girərək  müharibənin dayandırılmasını tələb edirlər.  Azərbaycan Ordusunun döyüşlərdə qazandığı qələbədən məyus olan, 1994 –cü ildən kağız üzərində olsa da, atəşkəsin kəsilməsi ilə maraqlanmayan erməni havadarları indi «atəşkəs»i tələb edirlər. Ermənistan silahlılarının qurbanları olan azərbaycanlıların taleyi ilə maraqlanmayan  ATƏT-in Minsk qrupunun  dövlətləri biri-birinin ardınca  bəyanat verərək erməniləri dəstəklədiklərini rəsmi surətdə bildirirlər.

Gəncədə baş verən  dağıntıları, insanların, atəş səsindən vahimələnən uşaqların təlaş və iztirablarını müşahidə edən xarici ölkə jurnalistlərinin açıqlamalarına əhəmiyyət verməyən ermənilərdən betər erməni havadarları daşnaklar tərəfindən öldürülən  azərbaycanlıların qətlini görməzdən gələrək əksinə   işğalçının silahlandırılmasına yardım göstərirlər. Humanitar  atəşkəs adı ilə  Ermənistana silah-sursat daşınması təmin edilir,  işğalçının müdafiəsini möhkəmləndirilməsinə çalışırlar. İllərdən bəri  işğalçını dəstəkləyən,   ikili standartlara belə krizis zamanında da sadiq qalan Minsk qrupunun həmsədr ölkələrinin başçıları görünür insanlıq qanunlarından xəbərsizdirlər.

Ötən il  Parisin küçələrini barrikadaya çevirən «sarı jiletlilər»ə qarşı amansız rəftarı ilə  seçilən  Fransanın prezidenti Emmanuel Makronun  erməni sevgisinin arxasında   faşistlərə  aid genosid, qana hərislik xisləti  dayanır.   Azərbaycanın öz torpaqları uğrunda mübarizəsini Ermənistana təcavüz kimi qələmə verən həmin dəstəkçilər əsl həqiqəti bilsələr də,  öz maraqları naminə tarixi həqiqətlərin üstündən xətt çəkirlər. Nəticədə isə  beynəlxalq hüquq tapdalanır. Müharibə  qaydalarına görə müqavimət göstərməyən dinc əhaliyə qarşı silahlı  müdaxilə yol verilməzdir. Ermənilərin hədəfə aldıqları  ərazilər cəbhə bölgəsindən xeyli uzaqda yerləşir və  mülki əhalinin onlarla təmasda olması qeyri-mümkündür. Həmişə işğalçını  dəstəkləyən,  Azərbaycan Ordusu qarşısında məğlub olan Ermənistanın gücsüzlüyündən məyus olan  «superlər»  hər vasitə ilə təcavüzkara  hərbi yardım göstərməyə yol tapırlar.  «Humanitar atəşkəs» bəhanəsi ilə  Ermənistana əlavə  silah-sursatla yardım edən  Rusiya Dağlıq Qarabağ münaqişəsinin sülh yolu ilə həllinə məsul olan ATƏT-in Minsk qrupunun həmsədr ölkəsi olduğunu unudaraq,  siyasətində birtərəfli mövqe nümayiş etdirərək, Ermənistana döyüşmək üçün «nəfəslik» açdı. Halbuki Minsk qrupuna daxil olan hər üç dövlətin Ermənistanı dəstəkləməsi, birtərəfli münasibət göstərməsi faktiki olaraq bu qrupu  səlahiyyətsiz edir.

«Bu gün bütün cəbhə boyu döyüşlər gedir. Azərbaycan bütün istiqamətlər üzrə mövqelərini möhkəmləndirir və biz işğalçını, təcavüzkarı sülhə məcbur edirik… Onlar bizim gücümüzü gördülər, bizim iradəmizi gördülər. Onlar gördülər ki, dünyada heç bir qüvvə bizi haqq yolumuzdan döndərə bilməz. Dünyada heç bir ölkə bizim iradəmizə təsir edə bilməz» söyləyən Prezident, Ali Baş Komandan  İlham Əliyevin bildirdiyi kimi,  Azərbaycan  haqq yolundadır.  Azərbaycan   qalib gələn, zəfər çalan ölkə  olacaq.

Xuraman İsmayılqızı, «İki sahil»