Nepalda xilasedicilər daşqın bölgəsində yerləşən su elektrik stansiyasından (SES) 10 gündən sonra Çin vətəndaşını sağ tapıblar.

“İki sahil” xəbər verir ki, bu barədə Çinin Nepaldakı səfirliyi məlumat yayıb. Çin vətəndaşı təbii fəlakət bölgəsindəki stansiyanın tunelində Cənubi Koreyadan olan fəlakət üzrə ekspert qrupu ilə koordinasiyalı şəkildə Nepal ordusu tərəfindən xilas edilib. Sağ qalan şəxs tibbi müayinə və müalicə üçün xəstəxanaya aparılıb. Nepal ordusu təbii fəlakət bölgəsindəki bir neçə su elektrik stansiyası layihəsində tikililərin içərisində qalan insanları tapmaq üçün Çin, Hindistan və Cənubi Koreyadan olan mütəxəssislər də daxil olmaqla xarici texniki qruplarla koordinasiyalı şəkildə axtarış-xilasetmə əməliyyatları aparır.

Qeyd edək ki, avqustun 26-da Nepalın Çin ilə həmsərhəd bölgəsində baş verən daşqın nəticəsində bir neçə kənd, iki ölkə arasındakı sərhəd-keçid məntəqəsi palçıq və qaya axını altında qalıb. Son məlumata görə, Nepal tərəfdə 1344 nəfər ölüb, təxminən 5 min nəfər itkin düşüb. Təbii fəlakət nəticəsində Nepalda 7570 fərdi ev, 48 dövlət binası dağılıb, 18 məktəbə ciddi zərər dəyib. Bundan başqa, 55 kilometr uzunluğunda yol tamamilə dağılıb, 37 körpü yararsız hala düşüb. Çin tərəfdə isə ölənlərin sayı 31-ə çatıb. Təbii fəlakət nəticəsində 531 nəfər itkin düşüb. Hazırda ərazidə axtarış-xilasetmə əməliyyatı və təbii fəlakətin nəticələrinin aradan qaldırılması işləri davam edir. Əməliyyatlara 2300 xilasedici, o cümlədən hərbçilər cəlb olunub.

Sentyabrın 4-də Nepalda dağıdıcı daşqından 9 gün sonra xilasedicilər su elektrik stansiyasının tunelindən 2 nəfəri sağ çıxarıblar. Onlar hidroenergetika obyektlərindən xilas edilən ilk şəxslər olub.