Kimyaçılar və nüvə təhlükəsizliyi üzrə mütəxəssislər müəyyən ediblər ki, Konqo Demokratik Respublikasında (KDR) kobalt filizinin hasilatı MAQATE və digər profil struktur tərəfindən həyata keçirilən mövcud monitorinq sistemlərindən kənar, dünya bazarına təxminən 2–5 min ton uranın daxil olmasına gətirib çıxarıb.

“İki sahil” xəbər verir ki, bu barədə Medisondakı Viskonsin Universitetinin (UW) mətbuat xidməti məlumat yayıb.

"Anlamaq vacibdir ki, tədqiqatımız uranın Konqo Demokratik Respublikasından şüurlu şəkildə çıxarıldığını iddia etmir, lakin bu faktın özü ciddi narahatlıq doğurur. Qeydiyyata alınmamış bu uranın ümumi kütləsi çox böyükdür — bu həcm onun bazasında 600-ə yaxın nüvə döyüş başlığı yaratmağa və ya adətən istifadə olunan yüngül su nüvə reaktorunu dörddəbir əsr (25 il) ərzində yanacaqla təmin etməyə imkan verir", — deyə universitetin dosenti Sebastyan Filippe bildirib.

Filippe və onun həmkarı Rayan Manzuk KDR-in cənub bölgələrində son dörddəbir əsrdə həyata keçirilən kobalt hasilatının fəsadlarını araşdırarkən bu qənaətə gəliblər. Bütövlükdə litium akkumulyatorlarına olan tələbatın artması fonunda regionda kobalt hasilatının sürəti son illərdə kəskin yüksəlib.

Alimlər qeyd edirlər ki, KDR-dəki bir çox kobalt yataqları XX əsrin ortalarında ABŞ-da ilk atom bombalarının yaradılması üçün istifadə olunmuş məşhur uran ehtiyatları ilə qonşuluqda və ya onların daxilində yerləşir. Hazırda ölkədə rəsmi olaraq uran hasil edilmir, lakin kobaltla sıx qonşuluq səbəbindən bu parçalanan element teoriya olaraq kobalt filizi və ya onun emal məhsulları ilə birgə dünya bazarına sızır.