Azərbaycan xalqının Ümummilli Lideri Heydər Əliyev təkcə dövlət quruculuğu və siyasi uzaqgörənliyi ilə deyil, həm də elmin, təhsilin və mədəniyyətin inkişafına göstərdiyi qayğı ilə hər bir azərbaycanlının qəlbində dərin iz buraxmışdır. Onun rəhbərliyi dövründə elmin və təhsilin inkişafı dövlət siyasətinin əsas istiqamətlərindən biri kimi müəyyən edilmiş, Azərbaycan alimlərinin əməyinə yüksək qiymət verilmişdir.

Heydər Əliyev daim qeyd edirdi ki, “Elmi tərəqqisiz heç bir xalqın gələcəyi ola bilməz.” O, müstəqil Azərbaycanın elm potensialının güclənməsi, alimlərin sosial vəziyyətinin yaxşılaşdırılması və onların beynəlxalq elmi mühitdə layiqli yer tutması üçün böyük səylər göstərmişdir. Ulu öndərin təşəbbüsü ilə Azərbaycan Milli Elmlər Akademiyasının fəaliyyəti genişləndirilmiş, elmi tədqiqat institutlarının maddi-texniki bazası möhkəmləndirilmiş, gənc alimlərin inkişafı üçün dövlət proqramları hazırlanmışdır.

Heydər Əliyevin elm adamlarına göstərdiyi dərin ehtiram onun çoxsaylı çıxışlarında və görüşlərində də öz əksini tapmışdır. O, alimləri “xalqın mənəvi sərvətinin daşıyıcıları” adlandırırdı. Ulu öndər yaxşı bilirdi ki, dövlətin qüdrəti yalnız iqtisadi göstəricilərlə deyil, həm də onun elm və təhsil səviyyəsi ilə ölçülür.

Məhz bu uzaqgörən siyasətin nəticəsində bu gün Azərbaycan elmi yeni mərhələyə qədəm qoymuş, gənc alimlərimiz beynəlxalq səviyyədə tanınmağa başlamışlar. Prezident İlham Əliyev də bu ənənəni uğurla davam etdirərək elmə və alimlərə dövlət dəstəyini daha da gücləndirmişdir.

Ulu öndər Heydər Əliyevin elmin inkişafına verdiyi töhfələr, alimlərə olan hörməti və diqqəti xalqımız üçün böyük bir örnəkdir. O, hər zaman inanırdı ki, elmə və təhsilə sərmayə qoyan millət gələcəyə inamla addımlayır. Bu gün onun müəyyən etdiyi bu yol Azərbaycanı daha da yüksəklərə aparır, elmi nailiyyətlərimizi dünyaya tanıdır.

Aynur Qənbərova,
Bakı şəhəri, Xətai rayonu 263 nömrəli tam orta məktəbin  müəllimi,
YAP Xətai rayon təşkilatının ərazi partiya təşkilat sədrinin müavini