Bu gün türk dünyası "Dildə, fikirdə, işdə birlik" fəlsəfəsini müasir dövrün texnoloji və siyasi reallıqları ilə birləşdirərək, XXI əsrə öz damğasını vurmaqdadır. Bu yolda atılan hər bir addım, imzalanan hər bir sənəd və keçirilən hər bir görüş qardaşlığımızın polad iradəsinin təzahürüdür. Məhz bu sarsılmaz birliyin növbəti təzahürü kimi, Prezident İlham Əliyev Qazaxıstanın qədim və zəngin tarixi-mədəni irsə malik Türküstan şəhərində Türk Dövlətləri Təşkilatının (TDT) Dövlət başçılarının qeyri-rəsmi Zirvə görüşündə iştirak edib. Dövlətimizin başçısı çıxışında Türküstanın Azərbaycan üçün xüsusi əhəmiyyətini vurğulayaraq bildirib ki, mədəniyyət paytaxtımız Şuşa işğaldan azad edildikdən sonra məhz bu qədim şəhərlə qardaşlaşıb. Bu, xalqlarımızın və şəhərlərimizin ruhən bir-birinə nə qədər yaxın olduğunun bariz nümunəsidir.
“İki sahil” xəbər verir ki, bu fikirləri Milli Məclisin deputatı Kamran Bayramov mətbuata açıqlamasında bildirib. K.Bayramov qeyd edib ki, türk dünyasının sarsılmaz birliyi və strateji tərəfdaşlığı bu gün regionda yeni bir reallıq yaradır: “Bu birlik təkcə ortaq tarixi köklərə deyil, həm də gələcəyə yönəlmiş böyük iqtisadi və siyasi hədəflərə söykənir. Azərbaycan və Qazaxıstan bu prosesin ön sıralarında addımlayaraq, həm ikitərəfli müstəvidə, həm də Türk Dövlətləri Təşkilatı daxilində sarsılmaz bir körpü rolunu oynayır. Bu qardaşlıq bağları hər iki dövlətin liderlərinin iradəsi sayəsində daha da möhkəmlənərək strateji müttəfiqlik zirvəsinə ucalmışdır. Prezident İlham Əliyev öz çıxışında bu münasibətlərin dinamikasını və gələcək perspektivlərini belə ifadə etmişdir. Qazaxıstan ilə Azərbaycan arasındakı sıx əlaqələri nümayiş etdirmək üçün təkcə prezidentlər səviyyəsində həyata keçirilən qarşılıqlı səfərləri göstərmək olar”.
Deputat vurğulayıb ki, bu gün Türk Dövlətləri Təşkilatının beynəlxalq çəkisi artır, qlobal proseslərdə rolu və mövqeyi güclənir. Keçən ilin oktyabr ayında Qəbələ Zirvə Görüşündə sədrliyi qəbul edən Azərbaycan təşkilat çərçivəsində əməkdaşlığın daha da dərinləşməsi istiqamətində fəaliyyət göstərir. Yaxın günlərdə Bakıda keçiriləcək BMT-nin Ümumdünya Şəhərsalma Forumunun 13-cü sessiyası çərçivəsində Türk Dövlətləri Təşkilatının şəhərsalma üzrə yüksəksəviyyəli dialoqu təşkil ediləcək. Türk dövlətləri arasındakı bağlar təkcə siyasi və iqtisadi amillərlə deyil, həm də sarsılmaz elmi və mədəni təməllər üzərində bərqərar olmuşdur. Tarixin sınaqlarından keçərək bu günümüzə gəlib çatan ortaq irsimiz, müasir dövrün texnoloji nailiyyətləri ilə birləşərək bizi daha parlaq gələcəyə səsləyir. Azərbaycan bu birliyin həm elmi-mədəni köklərinin qorunmasında, həm də gələcəyin rəqəmsal dünyasına inteqrasiya olunmasında mühüm platforma rolunu oynayır. Bu baxımdan, qarşıdakı dövrdə nəzərdə tutulan tədbirlər və strateji addımlar böyük əhəmiyyət kəsb edir.
K.Bayramov vurğulayıb ki, müasir dövrün geosiyasi mənzərəsi türk dövlətlərinin həm iqtisadi, həm də rəqəmsal platformada daha sıx birləşməsini tarixi zərurətə çevirib. Azərbaycan bu strateji inteqrasiyanın mərkəzində dayanaraq, qitələri birləşdirən nəqliyyat və kommunikasiya dəhlizlərinin reallaşmasında liderlik nümayiş etdirir. Bu gün türk dünyası təkcə ortaq mənşəyimizlə deyil, həm də Avrasiyanın gələcək xəritəsini formalaşdıran nəhəng infrastruktur layihələri ilə bir-birinə bağlanır. Prezident İlham Əliyev bu istiqamətdə həyata keçirilən strateji addımları və gələcək hədəfləri belə ifadə edib: “Rəqəmsal inkişaf sahəsində Türk dövlətləri ilə əməkdaşlıq uğurla davam edir. Avropa ilə Asiya arasında “Rəqəmsal İpək Yolu” layihəsi icra olunur. Bu layihənin tərkib hissəsi olan, Azərbaycan ilə Qazaxıstan arasında Transxəzər Fiber-Optik Kabel xəttinin yaxın aylarda istifadəyə verilməsi planlaşdırılır.
Türk dövlətləri ilə nəqliyyat sahəsində əməkdaşlığımız genişlənir. Cari qlobal geosiyasi şəraitdə Orta Dəhlizin əhəmiyyəti daha da artır. Reallaşmaqda olan Zəngəzur dəhlizi Orta Dəhlizin əsas seqmentlərindən birinə çevriləcək. Orta Dəhliz boyunca gömrük prosedurları sadələşdirilir. Türk Dövlətləri Təşkilatı çərçivəsində hazırlanmış “e-Permit” sistemi elektron icazələrin operativ şəkildə verilməsini təmin edir.”
K.Bayramov əlavə edib ki, türk dünyasının bu günü və gələcəyi artıq sadəcə ortaq keçmişin üzərində deyil, həm də müasir dövrün tələbi olan rəqəmsal güc, strateji nəqliyyat dəhlizləri və sarsılmaz siyasi iradə üzərində yüksəlir. Türküstan Zirvə görüşündə səslənən hər bir fikir, irəli sürülən hər bir layihə bir daha təsdiq etdi ki, türk dövlətləri arasındakı qardaşlıq bağları artıq qlobal arenada hesablaşmalı olan nəhəng bir güc mərkəzinə çevrilməkdədir. Prezident İlham Əliyevin rəhbərliyi ilə Azərbaycanın bu birliyə verdiyi töhfələr, Zəngəzur dəhlizi kimi strateji layihələr və rəqəmsal innovasiyalar türk dünyasını coğrafi və iqtisadi cəhətdən bir-birinə daha da yaxınlaşdırır. Bu yolun sonunda görünən mənzərə isə aydındır: XXI əsr türk dövlətlərinin yüksəliş, texnoloji inkişaf və vahid ailə kimi birlikdə qələbə çalacağı bir əsr olacaqdır. Azərbaycanın bu yoldakı qətiyyətli addımları isə türk ailəsinin sarsılmaz sütununu təşkil edir.
