Birinci Qarabağ savaşında Vətən-torpaq uğrunda canını fəda edən  qeyrətli oğlanlardan biri də Azad Bayramovdur. İgidliyi və cəsarəti ilə qəlblərdə özünə əbədi abidə ucaldan bu Vətən sevdalısı  28 may 1973-cu il tarixində Lerik rayonunun Siyov kəndində müəllim ailəsində dünyaya göz açıb.   1980-cı ildə M. Qafarov adına Siyov kənd tam orta məktəbinin birinci sinfinə gedib, 1990-ci ildə həmin məktəbin 10-cu sinfini bitirib. Dərslərində “əla” qiymət alıb, istedadı, nümunəvi tərbiyəsi, vətənpərvərliyi ona böyük sevgi qazandırıb. El-obada hamı Azadın Vətəninə ləyaqətli övlad olacağına inanıb.

Qəlbi Vətən, xalq üçün şirin-şəkər arzularla dolu olan, gəncliyin ən ülvi duyğular dövrünə qədəm qoyan Azadın  ali təhsil almağına  yağı düşmənin Qarabağımıza ədalətsiz təcavüzü imkan verməyib. Lerik Rayon hərbi komissarlığı tərəfindən həqiqi hərbi xidmətə çağırılan Azad döyüş bölgəsində Vətən torpaqlarının keşiyini çəkib. Azğın dığalara qarşı  döyüş yolu Füzulidən başlayib.  Sinəsini  irəli verib müharibə meydanına girəndə düşməni məğlub edən günədək vuruşacağına and içib. İgid əsgər  Füzuli  uğrunda gedən döyüşlərdə mərdlik göstərərək dığalara ağır zərbələr vurub, bir-birindən çətin döyüş əməliyyatlarında fərqlənib.

14 avqust 1993-cu ildə  isə  Qizilqaya yüksəkliyində əsgər yoldaşlari ilə bərabər ermənilər tərəfindən  3-4 gün mühasirədə qalmaqla ağır döyüşdən sonra orada  itkin düşüb.1997-ci ildə Lerik Rayon məhkəməsi tərəfindən  Azad Muxtar oğlu Bayramova şəhid statusu verilib.

Vətən, torpaq uğrunda şəhid olanlar ölmürlər. Azad Bayramov  cismən aramızda  olmasa da, göstərdiyi qəhrəmanlıqla  mənən milyonların ürəyində  yaşayır, hər an böyük məhəbbətlə  ehtiramla xatırlanır. Doğma Siyov kəndində onun adına bulaq abidə kompleksi ucalır. Bu saf sulu bulaqdan içənlər Azadla qürur duyurlar.

Zəfər Orucoğlu,
Azərbaycan Jurnalistlər Birliyinin üzvü