Qayıdış Konsepsiyası layihəsi ilə bağlı Qərbi Azərbaycan İcmasının təqdim etdiyi e-mail ünvana çox sayda təkliflər göndərilib.
“İki sahil” xəbər verir ki, bunu İcmanın mətbuat katibi Ülviyyə Zülfiqar bildirib.
İcma tərəfindən ictimaiyyətdən təkliflərin qəbul olunması üçün xüsusi e-mail ünvan yaradılaraq yanvarın 21-i saat 18:00-dək təkliflərin qəbul olunacağı bildirilmişdi.
Mətbuat katibi bildirib ki, e-mail ünvana gələn təkliflər alimlər, mütəxəssislər, ictimaiyyət nümayəndələri və xarici ekspertlər tərəfindən göndərilib. “Təkliflərin hər biri qeydə alınıb. Aralarında işimizə çox faydalı olacaq fikirlərin yer aldığı təkliflər var ki, bunun da Konsepsiya layihəsinin hazırlanması prosesində çox yararlı olacağını düşünürük. Bundan başqa, İcmada artıq bir neçə dəfə Qayıdış Konsepsiyası layihəsinə təkliflərlə bağlı idarə heyəti, ziyalılar, elm adamları ilə görüşlər keçirilərək dinləmələr aparılıb. Konsepsiya qəbul edildikdən sonra İcma fəaliyyətini bu sənəd üzərindən quraraq işinə davam edəcək",-deyə icmanın sözçüsü vurğulayıb.
Qeyd edək ki, “Qərbi Azərbaycan İcması” “Qayıdış konsepsiyası” ilə bağlı ictimaiyyətə müraciət edib.
Müraciətdə deyilir ki, “Qərbi Azərbaycan İcması” indiki Ermənistan ərazisindən qovulmuş azərbaycanlıların beynəlxalq konvensiyalarda əks olunan geriyə qayıtmaq hüququ əsasında, sülh yolu ilə öz evlərinə qayıdışına dair konsepsiya (“Qayıdış konsepsiyası”) layihəsi üzərində işini davam etdirir:
"Geniş ictimaiyyət bu məsələyə yaxından maraq göstərir. Alimlər, mütəxəssislər, sadə vətəndaşlar İcma ilə əlaqə saxlayaraq konsepsiyaya dair öz düşüncə və təkliflərini təqdim edirlər. Daxil olan ideya və təkliflər layihənin hazırlanması işində faydalı olmuşdur. Bununla əlaqədar olaraq, İcma geniş ictimaiyyətə müraciət edərək, “Qayıdış Konsepsiyası”nın layihəsinə dair təkliflərini təqdim etməyə çağırır. Təkliflər 21.01.2023 tarixi, saat 18:00-dək [email protected] elektron poçtu ünvanına təqdim edilə bilər. Beynəlxalq ümumi hüquq, humanitar hüquq, insan hüquqları, post-münaqişə dövründə reabilitasiya və re-inteqrasiya, qaçqınların hüquqları kimi mövzularda ixtisaslaşmış mütəxəssislərin rəy və təkliflərinə xüsusilə böyük ehtiyac vardır. Təkliflər Azərbaycan, ingilis, rus, fransız və ya alman dillərinin birində təqdim edilə bilər", - müraciətdə deyilir.
