Ölkənin ictimai həyatında daim fəallıq göstərmiş Azərbaycan neftçiləri bu gün də koronavirus pandemiyası ilə mübarizə istiqamətində həyata keçirilən tədbirlərdə yaxından iştirak edir, birlik və həmrəylik nümayiş etdirirlər. Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın ölkəmizdəki irsi qan xəstələrinin, o cümlədən qan ehtiyacı olan insanların probleminin həlli üçün qanvermə kampaniyası keçirilməsi haqqında təşəbbüsünə qoşulan SOCAR-da 100 nəfərə yaxın donor neftçi aprelin 20-də qan verib.
Qanvermə aksiyasında "Neftqaztikinti" Trestinin idarəetmə aparatının rəhbər, mühəndis-texniki işçiləri, o cümlədən Trestin struktur bölmələrinin də əməkdaşları iştirak edirdilər. “Neftqaztikinti” Trestinin baş mühəndis- I müavini Elmirzə Adgözəlov, müdir müavinləri Elxan Salmanov, Almas Kərimov ilk qan verənlərdən oldu. Donorlara bildirildi ki, qanvermə aksiyasının keçirilməsində məqsəd talassemiyadan əziyyət çəkən uşaqlara dəstək olmaqdır.
“Neftqaztikinti” Trestinin İTTB-nin rəisi Elsevər Qurbanov, trestin şəbə rəisləri Allahverdi Vəlizadə, Akif Vəliyev, mühasib Əfqan Əsgərov, QTDDMB-nün sahə rəisi Nofəl Cəbrailov, 3 saylı TQB-nün sahə rəisi Allahverdi Cabbarov, 2 saylı TQB-nün quraşdırıcısı Əli Paşayev və qanverən digər əməkdaşlar bildirdilər ki, SOCAR-ın təşkil etdiyi qanvermə aksiyasının davamlı olaraq keçirilməsi əlamətdar hadisədir.
Milli Hematologiya və Transfuziologiya Mərkəzinin tibb personalının iştirakı ilə şirkətin “Neftqaztikinti” Trestində keçirilmiş aksiyanın davam etdirilməsi nəzərdə tutulur. Növbəti günlərdə bu nəcib aksiyaya SOCAR-ın digər bölmələrinin əməkçiləri də qoşulacaqlar.
Qeyd edək ki, Heydər Əliyev Fondu 2005-ci ildən “Talassemiyasız həyat naminə” layihəsini həyata keçirir. SOCAR 2009-cu ildən bu xeyirxah təşəbbüsünə dəstək verir. 2015-2019-cu illərdə şirkətin bütün idarələrinin iştirak etdiyi aksiyalarda 11 min nəfərdən artıq neftçi donorluq edib. Ötən ilin noyabrından başlamış növbəti qanvermə aksiyasına isə bu günədək 1000-dən çox neftçi qoşulub.
Orxan Vahidoğlu, “İki sahil”