Bu sözləri TƏBİB-in İcraçı direktoru Vüqar Qurbanov TƏBİB-in 2024-cü ilin yekunlarına və 2025-ci ilin planlarına dair mətbuat konfransında deyib. O bildirib ki, TƏBİB aparatında isə 315 nəfər fəaliyyət göstərir: “2024-cü il ərzində də peşəkar kadrların TƏBİB ailəsinin sıralarına qoşulması üçün işlər aparılıb. 2024-cü il ərzində tabeli tibb müəssisələrinə müsahibə tələb olunan vəzifələr üzrə 1 245 müraciət daxil olub. Onlardan 711 müraciətə müsbət rəy verilib. 79 namizəd tabeli tibb müəssisələrinin rəhbər vəzifələrinə qəbul olunub. İşə qəbulla bağlı daxil olan tabeli müəssisələr üzrə müsahibəsiz müraciətlərə dair isə 748 müraciət daxil olub. Onlardan 494 nəfərə müsbət rəy verilib. TƏBİB aparatında çalışmaq üçün isə 306 namizəd müsahibə mərhələsinə cəlb olunub. Onlardan 69 əməkdaş işə qəbul olunub”.
V.Qurbanov əlavə edib ki, il ərzində “Azərbaycan Tibb Universitetinin Müalicə və profilaktika fakültəsinin yuxarı kurs tələbələrinin TƏBİB-in tabeli tibb müəssisələrində orta tibb heyəti kimi işə qəbulu” layihəsi də keçirilib: “100 tələbə imtahandan uğurla keçərək təlimlərə cəlb olunub. “TƏBİB könüllüləri” layihəsi çərçivəsində isə tabeli müəssisələrdə ümumi könüllülük fəaliyyətinə 150-dən çox tələbə cəlb olunub”.
O bildirib ki, 29 namizəd müəssisələrə yönləndirilib, onlardan 11-i işə qəbul olunub: “Əməkdaşların bilik və bacarıqlarının təkmilləşdirilməsi məqsədilə vaxtaşırı təlimlər də keçirilib. TƏBİB aparatı üzrə 361 əməkdaş təlimlərə cəlb olunub. Tabeli tibb müəssisələrinin işçiləri üçün ümumilikdə cari ilin 11 ayı ərzində 435 təlim təşkil olunub. Bu tədbir və təlimlərdə 33 min 577 nəfər iştirak edib”.
Yaqut Ağaşahqızı, "İki sahil"
