16 illik yol Azərbaycanın dünya birliyində yeri və roluna möhtəşəm əlavələr etdi

Dövlətimizin başçısı İlham Əliyevin modernləşməyə və yeniləşməyə xidmət edən siyasətinin nəticəsində ölkəmiz ən islahatçı ölkələr, xalqımız ən xoşbəxt xalqlar sırasındadır

Düşünülmüş və məqsədyönlü siyasəti ilə Azərbaycanın dünyaya Günəş kimi doğmasına yol açan ulu öndər Heydər Əliyevin siyasi kursunun son 16 ildə Prezident İlham Əliyev tərəfindən uğurla davam etdirilməsi nəticəsində ölkəmiz etibarlı tərəfdaş kimi mövqeyini daha da möhkəmləndirdi.

“Bu gün Heydər Əliyev siyasəti bütövlükdə bütün sahələrdə davam etdirilir. 2003-cü ildə  Azərbaycan xalqı mənə böyük etimad göstərərək Prezident vəzifəsinə seçdiyi gündən bu günə qədər bu siyasətə sadiqəm. Mən 2003-cü ildə bu barədə sözümü demişəm. Mən bu siyasətə sadiq qalacağam və 2003-cü ildən bu günə qədər Azərbaycanda gedən uğurlu inkişaf Heydər Əliyev siyasətinin təntənəsidir, müstəqil Azərbaycanın təntənəsidir.” Dövlətimizin başçısı  İlham Əliyevin  bu günümüzdən dünənimizə baxış fonunda səsləndirdiyi  bu fikirlər  2003-cü ildə keçirilən andiçmə mərasimində bəyan etdiyi “Mən bu böyük etimadı doğruldacağam, bu vəzifənin öhdəsindən  layiqincə gələcəyəm, Heydər Əliyev siyasətini davam etdirəcəyəm” vədinin təsdiqi, sabahımıza olan inam, ən əsası Ümummilli Liderin böyük əminliklə ifadə etdiyi “Azərbaycan dünyaya Günəş kimi doğacaq” tezisinin real həyatda göstəricisidir. Təbii ki, hər bir ölkənin inkişafı onun daxili potensialının yüksəlməsi ilə yanaşı, beynəlxalq  aləmdə çəkisinin, yerinin və  rolunun artmasında da ifadə olunur. Son 16 ilin xarici siyasət uğurlarından bəhs edərkən bu fikri böyük inamla qeyd edirik ki, Sovetlər İttifaqının dağılmasından sonra yaranan 15 dövlətdən  yalnız Azərbaycan dünyanın ən mötəbər qurumu olan  BMT Təhlükəsizlik Şurasının qeyri-daimi üzvü  seçilib. 155 ölkənin dəstəyini qazanmaq böyük uğur, diplomatik qələbə kimi dəyərləndirildi.   Bu mühüm hadisə Azərbaycanın  iqtisadi möcüzəsinin  beynəlxalq aləmdə çəkisinə nə qədər təsir göstərdiyinin aydın ifadəsini yaratdı.

Son 16 ildə  Azərbaycan  bütövlükdə regionun iqtisadi mənzərəsinə ciddi təsir göstərən, dünyada  əsl söz sahibinə çevrilən   bir dövlət kimi adını müasir tariximizə yazıb. Regional əməkdaşlığın aparıcı qüvvəsi kimi Azərbaycanın töhfələri davamlılığı ilə diqqət çəkir.  Azərbaycan  sözün həqiqi mənasında ciddi regional faktora çevrilib.  

“Bizim xarici siyasətimiz də  birmənalıdır, açıqdır, aydındır və müstəqildir” söyləyən dövlətimizin başçısı İlham Əliyev bildirir ki, böyüklüyündən, kiçikliyindən asılı olmayaraq bütün dövlətlərlə əlaqələrimiz qarşılıqlı hörmət və milli maraqlar prinsipi əsasında qurulur.     Təkcə 2019-cu ilin xarici siyasət uğurlarına diqqət yetirsək, 16 ildə əldə olunan nailiyyətlərin miqyasının nə qədər geniş olduğunu  aydın təsəvvür etmək mümkündür. Beynəlxalq aləmdə xoşbəxt, islahatçı  ölkə kimi tanınan Azərbaycan növbəti uğurları ilə bu xoşbəxtliyinə yeni əlavələr etdi. Bu əlavələr sırasında ölkəmizin  sözünün imzası qədər dəyərinin artması, etibarlı tərəfdaş kimi mövqeyinin möhkəmlənməsi öz növbəsində yeganə problemimiz olan Ermənistan-Azərbaycan Dağlıq Qarabağ münaqişəsinin ədalətli həllinə inamı daha da artırdı. Bu inama əsas verən digər amillərdən biri də beynəlxalq qurumların bu il çərçivəsində qəbul etdikləri  qərar və qətnamələrində, həmçinin imzalanan sənədlərdə  Azərbaycanın ədalətli mövqeyinin dəstəklənməsi, həmçinin iqtisadi uğurlarımız fonunda  ordumuzun artan gücü və qüdrətidir.

“Azərbaycan öz coğrafi vəziyyətindən bundan sonra da uğurla istifadə edəcək” söyləyən dövlətimizin başçısı İlham Əliyev bu reallığı da böyük inamla qeyd edir ki, nəqliyyat mərkəzlərindən birinə çevrilməyimiz artıq reallıqdır: “Şərq-Qərb, Şimal-Cənub nəqliyyat dəhlizləri Azərbaycan ərazisindən keçir. Keçməyə də bilərdi, əgər biz bu coğrafiyaya böyük sərmayə qoymasaydıq, əgər qonşu ölkələrlə çox yaxşı münasibətlərimiz olmasaydı. Əgər onun qonşularla münasibətləri yaxşı deyilsə, ölkə necə tranzit ölkəyə çevrilə bilər, bu, mümkün deyil. Ona görə də xarici siyasətimiz daxili vəziyyətimizin daha da yaxşı olmasına hesablanıb.”

Bu fakt inkaredilməzdir ki, Azərbaycanın yerləşdiyi region geosiyasi, strateji və iqtisadi baxımdan dünyanın siyasi xəritəsində əhəmiyyət kəsb edir. Bu baxımdan Azərbaycan həm qonşuluq siyasətində,  həm də digər region ölkələri ilə olan münasibətlərində  balanslaşdırılmış  siyasət yürütməkdədir. Burada  Azərbaycanın milli maraqları  əsasdır. Xarici siyasətdə balanslaşdırma siyasətinin əsas olaraq götürülməsi ölkəmizin  yerləşdiyi bölgənin həssas olmasından irəli gəlir. Dövlətimizin başçısı İlham Əliyev çıxışlarında bu məqama da xüsusi diqqət yönəldir: “Xarici siyasətimiz, eyni zamanda, Azərbaycanda təhlükəsizliyin təmin edilməsində də mühüm rol oynayır. Azərbaycanda daxildə təhlükə mənbələri yoxdur. Mən bunu dəfələrlə demişəm. Biz özümüzü mümkün olan risklərdən isə öz siyasətimizlə, o cümlədən uğurlu xarici siyasətimizlə qoruyuruq. Eyni zamanda, dünyada təhlükəsizliyə töhfəmiz də getdikcə artır. Təkcə təhlükəsizliyə yox, biz təhlükəsizliyi böyük dərəcədə şərtləndirən insanlararası, dinlərarası dialoqa da böyük töhfə veririk. Təsadüfi deyil ki, bu gün Azərbaycan dünya miqyasında multikulturalizmin mərkəzlərindən biri kimi tanınır. İlk növbədə, bu siyasət bizə lazımdır. Azərbaycanda bütün xalqların, dinlərin nümayəndələri çox rahat, bir ailə kimi yaşayırlar. Eyni zamanda, bu siyasət dünyaya lazımdır. Çünki bu gün dinlərarası məsələlər getdikcə narahatlıq doğurur. Toqquşmalar, anlaşılmazlıq, ayrı-seçkilik, ksenofobiya - bütün bunları biz dünyada görürük. Biz öz siyasətimizi ortaya qoyuruq, öz nümunəmizi göstəririk.” Azərbaycanın beynəlxalq aləmdə  mövqeyinin möhkəmlənməsini təsdiqləyən biri-birindən önəmli səfərlər,   keçirilən görüşlər, beynəlxalq əhəmiyyətli tədbirlərə ev sahibliyi etmək ənənəsinin formalaşması və s. Təbii ki, ölkəmizdə  mövcud olan  sabitlikdən qaynaqlanır. BMT-nin Sivilizasiyalar Alyansının Qlobal Forumu, Dünya Dini liderlərinin Zirvə Görüşü,  Ümumdünya Mədəniyyətlərarası Dialoq Forumu, Bakı Beynəlxalq Humanitar Forumu,  “Bakı Prosesi” Azərbaycanı  humanitar mərkəz  kimi tanıdıb. Müxtəlif mədəniyyətlərin, sivilizasiyaların arasında  körpü rolunu oynayan  Azərbaycan Cənubi Qafqazın lider ölkəsi kimi  əməkdaşlıq məkanına çevrilib. Diplomatik uğurlarımız sırasında bu məqamı xüsusi qeyd etməliyik ki,    Rusiya və  NATO-nun ali hərbi rəhbərlərinin görüşlərinin mütəmadi olaraq ölkəmizdə   keçirilməsi artan nüfuzunun, siyasi çəkisinin, ən əsası inamın və  etimadın göstəricisidir. “Bu çox əlamətdar hadisədir. Dünyada  BMT-yə üzv olan 200 ölkə var və bu ölkələr arasında bu görüş məhz Azərbaycanda  keçirilir. Avropada 50-yə yaxın ölkə var, ancaq bu görüş Azərbaycanda keçirilir” söyləyən ölkə Prezidenti  İlham  Əliyev  bildirir ki,  bunun  başlıca səbəbi  çox etibarlı tərəfdaş, sözü ilə  əməli eynilik təşkil edən  Azərbaycana inamdır. Bu inam isə ölkəmizə çox böyük hörmət, etimad qazandırıb.

Azərbaycanın regional əməkdaşlığa böyük töhfəsi kimi Xəzərin hüquqi statusunun müəyyənləşdirilməsi ilə bağlı Konvensiyanın imzalanmasını qeyd etməliyik. İllərdən bəri davam edən bu məsələnin sonda uğurlu həllini tapmasında son illərin əməkdaşlıq formatlarında  yaranan yeniliklərin də öz rolu vardır. Azərbaycan artıq üçtərəfli, eyni zamanda, dördtərəfli formatda əməkdaşlıq əlaqələrinin qurulmasının təşəbbüsçüsü kimi çıxış edir və səylər öz müsbət nəticəsini verir. İkitərəfli əlaqələrin yol açdığı  Azərbaycan-İran-Rusiya, Azərbaycan-İran-Türkiyə, Azərbaycan-Gürcüstan-Türkiyə kimi  üçtərəfli əməkdaşlıq formatlarının təşəbbüskarı da məhz ölkəmizdir. Bu formatlar isə öz növbəsində əməkdaşlıqda yeni-yeni prioritetlərin müəyyənləşdirilməsini, qarşıya qoyulan hədəflərə yüksək səviyyədə nail olmağı şərtləndirir.

Mühüm uğurlarımız sırasında  Azərbaycanın Qoşulmama Hərəkatının xarici işlər nazirlərinin  konfransına, eyni zamanda, XVIII Zirvə Görüşünə   ev sahibliyi etməsi dayanır. Əsas məqsədi beynəlxalq hüquqa hörmət əsasında dünyada sülh, təhlükəsizlik və inkişafa yardım etmək olan Qoşulmama Hərəkatı müasir dünyada öz aktuallığını daha da artırır. Azərbaycan  Qoşulmama Hərəkatının xarici işlər nazirlərinin toplantısına və 2019-cu ildə  Zirvə Görüşünə ev sahibliyi, 2019-2022-ci illərdə quruma  sədrlik etməklə onun məqsəd və məramlarının təşviq olunmasına, beynəlxalq sülhün, təhlükəsizliyin və əməkdaşlığın güclənməsinə əsaslı töhfəsini verir və verəcək.  Azərbaycanın Qoşulmama Hərəkatının nisbətən yeni üzvü olduğunu önə çəkən dövlətimizin başçısı İlham Əliyev bu məqamı mühüm uğurumuz, eyni zamanda, səylərin birləşdirilməsinin vacibliyi kimi qeyd edir.  “Biz bu ailəyə 2011-ci ildə qəbul olunduq, dərhal təşkilatın və onun üzvlərinin dəstəyini hiss etməyə başladıq” söyləyən cənab İlham Əliyev bildirmişdir: “Bu dəstək Azərbaycanın BMT Təhlükəsizlik Şurasının qeyri-daimi üzvlüyünə seçilməsi proseduru zamanı nümayiş olundu... Qoşulmama Hərəkatının və İslam Əməkdaşlıq Təşkilatının dəstəyi bizim ən mötəbər beynəlxalq quruma üzv seçilməyimizdə həlledici rol oynadı. Bu, bir daha bizim gücümüzü nümayiş etdirir. Onu nümayiş etdirir ki, birlikdə olanda nailiyyətlərimiz çox ola bilər. Bu, üzv dövlətlər arasında həmrəyliyin təzahürüdür. Bu, eyni zamanda, təşkilatımızın imkanlarının göstəricisidir. BMT Təhlükəsizlik Şurasının qeyri-daimi üzvü seçilmiş Azərbaycan iki il ərzində orada təşkilatımızın bütün üzvlərini təmsil etdi. Bəyan etdik ki, biz uzun illərdir bir çox hallarda pozulan ədalət və beynəlxalq hüququ müdafiə edəcəyik.” Qoşulmama Hərəkatının XVIII Zirvə Görüşünün sonunda qəbul olunan Bəyannamədə   Azərbaycanın ərazi bütövlüyünün dəstəklənməsi cari ildə əldə etdiyimiz mühüm diplomatik uğurlardandır.

Azərbaycanın  Avropa İttifaqı ilə əlaqələri də yüksələn xətlə inkişaf etmişdir.  Belə ki, cənab İlham Əliyevin bu illər ərzində  Belçikaya reallaşdırdığı  səfərlər çərçivəsində Azərbaycanla Avropa İttifaqı arasında imzalanan sənədlər, ən əsası ötən il  “Tərəfdaşlığın prioritetləri” adlı sənəd qurumla ölkəmiz arasında əlaqələrin hazırkı səviyyəsinə bir daha işıq saldı.  O cümlədən bu sənəddə Ermənistan-Azərbaycan Dağlıq Qarabağ münaqişəsinin həlli ilə bağlı olan müddəalar qeyd olunub. Bu sənəddə göstərilir ki, Azərbaycanın suverenliyi, sərhədlərinin toxunulmazlığı, ərazi bütövlüyü Avropa İttifaqı tərəfindən dəstəklənir.

Diplomatik  uğurlarımız sırasında  NATO-nun mövqeyində olan dəyişikliyi də qeyd etməliyik. Baxmayaraq bu qurum  dünyada təhlükəsizliyin, sabitliyin təminatçısı kimi çıxış edir, amma son illərə qədər Ermənistan-Azərbaycan Dağlıq Qarabağ münaqişəsinə seyrçi mövqeyi ilə diqqət çəkib. Azərbaycan dövlətinin uğurlu daxili və  xarici siyasəti nəticəsində artıq   NATO-nun Zirvə görüşlərində qəbul edilmiş bəyannamələrdə  Azərbaycanın ərazi bütövlüyünə dəstək beynəlxalq münasibətlər sistemində mövqeyimizi daha da möhkəmləndirir.  Hərbi qüdrəti artan,  dünya miqyasında 50 ən güclü ordu sırasında olan Azərbaycan Ordusunun hazırlığı və döyüş qabiliyyəti  NATO standartlarına  cavab verir. Ölkəmizdə  keçirilən “ADEX”  beynəlxalq müdafiə sərgiləri,  möhtəşəm hərbi paradlar, Müdafiə Sənayesi  Nazirliyinin müəssisələri tərəfindən mindən çox adda hərbi təyinatlı məhsulun istehsal olunması Ordumuzun döyüş qabiliyyətinin, hərbi diplomatiyamızın yüksək səviyyəsini göstərir.

Dövlətimizin başçısı İlham Əliyevin yuxarıda qeyd etdiyimiz fikirlərinə istinadən, Azərbaycanın xarici siyasətində qonşu dövlətlərlə əlaqələrin qurulması və yüksələn xətlə inkişafı prioritet məsələlərdəndir. Səylərin birləşdirilməsi qarşıya qoyulan məqsədlərə yüksək səviyyədə nail olmağa stimul verir. Regional əməkdaşlığın inkişafına böyük töhfə olan BTQ dəmir yolunun istifadəyə verilməsi, həmçinin BTC və BTƏ neft-qaz kəmərlərindən sonra beynəlxalq əməkdaşlığa geniş imkanlar açan Cənub Qaz Dəhlizinin rəsmi açılışı, TANAP-ın istifadəyə verilməsi və sair Azərbaycanın beynəlxalq aləmdə möhkəmlənən mövqeyinin təqdimatlarıdır.

Təkcə 2019-cu ildə  ölkə Prezidenti  İlham Əliyevin    xarici ölkələrə onlarla səfərinə, eyni zamanda, bu sayda da digər ölkələrin  dövlət və hökumət başçısının Azərbaycana  rəsmi və işgüzar  səfərlərinə, ölkəmizin ev sahibliyi etdiyi beynəlxalq əhəmiyyətli tədbirlərə diqqət yetirmək kifayətdir. İslam aləminin ayrılmaz parçası olan  Azərbaycanın İslam həmrəyliyinin inkişafına töhfələri davamlılığı ilə diqqət çəkir. Ölkəmizdə  “Multikulturalizm İli”nin, “İslam Həmrəyliyi İli”nin elan olunması ölkələrarası birlik, həmrəyliyin möhkəmləndirilməsinə töhfəsini verir və  Azərbaycanın sülhün, sabitliyin, qarşılıqlı əməkdaşlığın möhkəmlənməsinə yönələn təşəbbüsləri dünya ictimaiyyəti tərəfindən çox yüksək qiymətləndirilir, ən əsası tolerant ölkə kimi  nüfuzunu artırır.

“Azərbaycanın beynəlxalq əməkdaşlığa verdiyi töhfə çoxşaxəlidir. Qeyd etdiyim kimi, onlardan biri mədəni körpülərin qurulmasına yönələn səylərimizdir ki, onlar Asiya və Avropa, Avropa ilə müsəlman dünyası arasında daha yaxşı anlaşmanın yaradılmasına xidmət edir” söyləyən dövlətimizin başçısı İlham Əliyev bildirir ki, bizim apardığımız siyasət hər zaman təhlükəsizlik, sabitlik və proqnozlaşdırıla bilməyə yönəlmiş qarşılıqlı əməkdaşlıq və dəstək üzərində qurulub.

Təbii ki, son 16 ilin xarici siyasət uğurlarını bir yazı çərçivəsində əhatə etmək qeyri-mümkündür. Başa çatmaqda olan 2019-cu ilin mühüm uğurlarına nəzər salmaqla, bir daha bu reallığı diqqətə çatdırırıq ki,  Azərbaycanın dünyaya açıq və çevik xarici siyasəti davamlı uğurlara yol açır, dünya birliyinin layiqli üzvünə, əsl söz sahibinə çevrilməsini şərtləndirir. Siyasətində müstəqil olan Azərbaycan bu mövqeyi ilə dünya birliyində əsl söz sahibinə çevrilir, cərəyan edən proseslərə təsir imkanları artır.  Bu gün xarici siyasətimizin əsas məsələsi, yeganə problemimiz Ermənistan-Azərbaycan Dağlıq Qarabağ münaqişəsidir. Təkcə cari ildə Azərbaycanın diplomatik uğurlarına və iqtisadi imkanları fonunda artan hərbi qüdrətinə diqqət yetirsək, bu problemimizin də tezliklə öz ədalətli həllini tapacağı inkaredilməzdir. Üçrəngli bayrağımızın Şuşada, Xankəndidə dalğalanacağı gün uzaqda deyil.

Yeganə Əliyeva, “İki sahil”

Redaksiyadan: Azərbaycan Prezidenti İlham Əliyevi doğum günü münasibətilə təbrik edir, Ona uzun ömür, cansağlığı, Azərbaycan Respublikasının daha da inkişafı naminə bütün işlərində və təşəbbüslərində yeni-yeni uğurlar arzulayırıq.