Fransanın İl-de-Frans regionunda fəaliyyət göstərən həmkarlar ittifaqlarının birgə qurumu oktyabrın 24-də keçiriləcək etiraz aksiyası üçün Paris Polis Prefekturasının təklif etdiyi yeni marşrutu rədd edib. Təşkilat əvvəlcədən razılaşdırılmış Bastiliya–Nation marşrutunun qüvvədə saxlanılmasını tələb edir.

“İki sahil” xəbər verir ki, birgə qurumun yaydığı bəyanata görə, Bastiliya meydanından Nation meydanına qədər olan marşrut əvvəlki gün prefektura ilə keçirilən iki uzun müzakirədən sonra razılaşdırılıb və rəsmiləşdirilib. Görüşlərdə yürüş iştirakçılarının təhlükəsizliyinin təmin edilməsi və aksiyanın dinc şəraitdə keçirilməsi üçün zəruri şərtlər müzakirə olunub. Həmkarlar ittifaqları bütün zəruri təminatları verdiklərini və marşrutun ictimaiyyətə elan edildiyini bildiriblər.

Lakin təşkilatın məlumatına görə, Fransa Prezidenti Emmanuel Makronun əvvəlki axşam verdiyi açıqlamalardan sonra prefektura nümayəndələri cümə günü səhər razılaşmaya yenidən baxılması məsələsini gündəmə gətiriblər.

Həmkarlar ittifaqları bu addımı “qəbuledilməz” adlandıraraq, son anda marşrutun dəyişdirilməsinin aksiyanın təhlükəsizliyini zəiflətdiyini və iştirakçılar üçün əlavə risklər yaratdığını bildiriblər. Onların fikrincə, əvvəlcədən razılaşdırılmış şərtlərin dəyişdirilməsi gərginliyin azaldılmasına xidmət etmək əvəzinə, nizamsızlıq üçün zəmin yaradır.

Təşkilat bu məsələnin yalnız marşrut dəyişikliyi ilə bağlı olmadığını, həm də nümayiş keçirmək azadlığına hörmətlə əlaqəli olduğunu vurğulayıb. Həmkarlar ittifaqları oktyabrın 24-nə təyin edilmiş aksiya üçün əvvəlcədən razılaşdırılmış marşrutun qüvvədə saxlanılmasını tələb edirlər. Plana əsasən, iştirakçılar Bastiliya meydanında toplaşacaq, yürüş isə Nation meydanında başa çatacaq.

Bəyanatda vurğulanır: “Nümayiş keçirmək azadlığı şəraitdən asılı olaraq dəyişdirilə bilməz. Bu azadlığa hörmət edilməli və ona təminat verilməlidir”.