Ekspert: Turizm şirkətləri payız mövsümündə turistlərə müxtəlif və cəlbedici turizm məhsulları təqdim etməkdə çətinlik çəkirlər

Xarici ölkələrə səyahətə maraq yalnız insanların istirahət planları ilə deyil, həm də iqtisadi imkanlar, nəqliyyat xərcləri və turizm bazarında formalaşan təkliflərlə bağlıdır. İlin müxtəlif dövrlərində səfərlərə tələbatın dəyişməsi bu amillərin turist seçimlərinə təsirini daha aydın göstərir. Xüsusilə payız aylarında səyahət qərarlarına təsir edən səbəblər, insanların istirahət üçün ayırdıqları büdcəyə münasibəti və turizm xidmətlərinin əlçatanlığı diqqət çəkən məsələlər sırasındadır.

Səyahət planlaşdırarkən turistlər, ilk növbədə, xərclərlə əldə edəcəkləri imkanları müqayisə edir, səfərin müddətini, istiqamətini və nəqliyyat vasitəsini seçirlər. Bu baxımdan xarici ölkələrə səfərin ümumi dəyəri, xüsusilə aviabiletlərin qiyməti, insanların qərarlarına təsir göstərən mühüm amillərdəndir. Nəqliyyat xərclərinin artması səfər büdcəsinə əlavə yük yarada, daha münasib qiymətlərin təklif olunması isə yeni istiqamətlərə marağı stimullaşdıra bilər. Belə şəraitdə turizm şirkətlərinin qiymət siyasəti və fərqli büdcələrə uyğun təklifləri də əhəmiyyət qazanır.

Digər tərəfdən, səyahətə tələbatın il ərzində dəyişməsi turizm xidmətləri göstərən şirkətlər qarşısında yeni yanaşmaların tətbiqini zəruri edir. Turistlərin seçimləri artıq yalnız ənənəvi istirahət imkanları ilə məhdudlaşmır. Mədəni tədbirlər, yerli təcrübələr, fərqli marşrutlar və səfər zamanı təqdim olunan xidmətlərin keyfiyyəti də istiqamət seçimində rol oynayır. Bu isə turizm bazarında rəqabətin güclənməsi ilə yanaşı, istehlakçı gözləntilərinə uyğun məhsulların hazırlanmasını da aktuallaşdırır.

Xarici turizmə tələbatın dəyişməsi eyni zamanda daxili turizmin inkişafı, regionların turizm potensialından istifadə və mövsümlər üzrə xidmətlərin şaxələndirilməsi baxımından da əhəmiyyətlidir. Turizm imkanlarının il ərzində daha səmərəli təqdim olunması həm sahibkarlar, həm də istirahətini planlaşdıran vətəndaşlar üçün yeni seçimlər yarada bilər.

Bəs payız aylarında xarici səfərlərə marağın azalmasının arxasında hansı amillər dayanır və turizm bazarı bu dəyişikliklərə necə uyğunlaşa bilər?

Turizm eksperti Kənan Hənifəyev “İki sahil”ə açıqlamasında bildirdi ki, əsasən yay və qış mövsümlərində, xüsusilə də tətil günlərində xarici ölkələrə səfərlərə maraq artır. Payız aylarında isə xaricə gedən yerli turistlərin sayında azalma müşahidə olunur. Bunun əsas səbəblərindən biri turistlərin səyahət üçün nəzərdə tutduqları vəsaitin böyük hissəsini ilin sonuna, Yeni il tətilinə və ya qış mövsümünə saxlamağa üstünlük vermələridir.

Bununla yanaşı, yerli turistlər daxili turizm imkanlarından da yararlanırlar. Xüsusilə həftəsonları və müxtəlif festivalların keçirildiyi vaxtlarda bölgələrə səfərlərə maraq göstərilir. Turizm şirkətləri isə payız mövsümündə turistlərə geniş çeşiddə məhsullar təqdim etməkdə çətinlik çəkirlər. Hazırlanan tur paketləri daha çox qış mövsümünə hesablanır.

Yerli turizm şirkətləri bu tendensiyadan yararlanmaq üçün hotellərlə əməkdaşlığı genişləndirməli, mövsümə uyğun maraqlı və interaktiv marşrutlar, eləcə də fərqli turizm məhsulları hazırlamalıdırlar.

Xarici səfərlərə təsir göstərən əsas amillərdən biri də aviabiletlərin qiymətləridir. Aviabiletlərin daha münasib qiymətlərlə təklif olunması həm Azərbaycan vətəndaşlarının xarici ölkələrə səfərlərinin artmasına, həm də ölkəyə gələn turistlərin sayının çoxluğuna müsbət təsir göstərə bilər.

Nigar Orucova, “İki sahil”