Fransanın milli təhsil naziri Eduar Jeffre bildirib ki, etiraz aksiyaları səbəbindən 400-500 lisey tamamilə və ya qismən bağlı qalacaq. O, həmçinin əlavə edib ki, sentyabrın ortalarından bəri 24 məktəb yandırılıb və ya dağıdılıb, 78 müəllim və digər məktəb əməkdaşı xəsarət alıb.

“İki sahil” xəbər verir ki, bu barədə "Kommersant" məlumat yayıb.

İlkin etiraz aksiyaları sentyabrın 21-də Parisətrafı Kretendəki Sent-Ekzüperi liseyində başlayıb. Daha sonra bütün Fransa üzrə yüzlərlə liseyin şagirdləri onlara qoşulublar. Bəzi hallarda etirazlar polislə toqquşmalarla nəticələnib. Etirazçıların özləri və tərəfdarları bildirirlər ki, onlar Fransa təhsilindəki müəllim çatışmazlığı, həddindən artıq dolğun siniflər və təhsil müəssisələrinin pis vəziyyəti kimi problemlərdən narazıdırlar.

Tənqidçilər hesab edirlər ki, etirazlar ifrat sol qruplar tərəfindən təşkil olunub və aksiyaların iğtişaşlara səbəb olduğuna diqqət çəkirlər. Jeffre bəyan edib: "Bəzi fəallar, xüsusilə də ifrat sol dairələrdən gələnlər şagird hərəkatına sızaraq onu öz əllərinə alıblar və onları kəskin zorakılığa sürükləyiblər".

Şagird həmkarlar ittifaqları isə artıq oktyabrın 6-da kütləvi nümayiş keçirməyə çağırış ediblər.