Texnoloji gerilik və daxili fikir ayrılıqları Avropa İttifaqının dünya arenasındakı mövqelərini zəiflədib.

“İki sahil” xəbər verir ki, bu fikri ABŞ-ın Bloomberg agentliyinin şərhçisi Lionel Loran ifadə edib.

Aİ-nin Amerika silah və texnologiyalarından asılılığı, yüksək texnologiyalar sahəsində öz lider şirkətlərinin olmaması və daxili siyasi ziddiyyətlər Brüsselin beynəlxalq gündəmə təsir etmək imkanlarını məhdudlaşdırır. Xüsusilə də, Yaxın Şərq problemləri üzrə "birliyin səsi eşidilmir", həmçinin Ukraynadakı münaqişənin tənzimlənməsinə də "heç kim dəvət etmir".

2020-ci ildən bəri Aİ-nin müdafiə xərclərinin iki dəfə artmasına baxmayaraq, texnologiya sahəsində ABŞ və Asiya ilə yaranan boşluq böyüməyə davam edir. Birlik bulud texnologiyaları sahəsində Amerika şirkətlərindən, nadir torpaq metallarının tədarükündə isə Çindən asılıdır. Avropa İttifaqına nadir torpaq metalları idxalının təxminən 70%-i ÇXR-in payına düşür ki, bu da lazım gələrsə Pekinə avropalılara təzyiq göstərməyə imkan verə bilər, deyə jurnalist iddia edir.

Aİ sənayesi həm də ÇXR tərəfindən güclənən rəqabətlə üzləşir: birliyin ticarət məhdudiyyətləri çinli istehsalçıların Avropa ölkələrinin avtomobil bazarlarında rekord pay tutmasına mane olmayıb.