Jodi Foster adlı piton hazırda elektrokimyaterapiya müalicəsi aldıqdan sonra şişdən sağalma mərhələsindədir. İngiltərənin şimalında yerləşən Çester zooparkında ona qulluq edənlər ilanın iştahasının və enerjisinin azaldığını müşahidə ediblər. Müayinələr nəticəsində onun çənə nahiyəsində bədxassəli şiş olduğu müəyyənləşdirilib. Şiş götürüldükdən sonra problem yenidən ortaya çıxıb və bundan sonra yeni müalicə üsulunun tətbiqi nəzərdən keçirilib.

“İki sahil” xəbər verir ki, 23 yaşlı heyvan ötən ilin oktyabrında adətən insanlar üçün tətbiq olunan müalicədən yararlanıb. Zooparkın məlumatına görə, elektrik impulsları ilə xərçəngə qarşı dərmanın birləşdirildiyi bu qabaqcıl müalicəni alan ilk ilan məhz odur.

Uzunluğu 4,5 metr, çəkisi 40 kiloqram olan sürünənə müdaxilə etmək asan olmayıb. Əməliyyatdan əvvəl ilanı narkoz vəziyyətinə gətirmək üçün azı dörd nəfərin köməyinə ehtiyac olub. Əməliyyat otağında isə kiçik bir qrup Jodinin və onun ağzının ətrafında çalışaraq lazımi müalicəni həyata keçirib.

"Biz onun çənəsinin bir hissəsini götürə bildik, daha sonra qalan toxumaya kimyaterapiya dərmanı yeritdik. Ardınca elektrokimyaterapiya apardıq: toxumaya kiçik metal elektrodlar yerləşdirdik və onlara elektrik impulsları verdik. Bu, mahiyyət etibarilə xərçəng hüceyrələrini məhv etməyə və kimyaterapiya dərmanının daha yaxşı sorulmasına imkan verir", – deyə cərrahi müdaxiləyə rəhbərlik edən doktor Yan Eşpol danışıb.

Çester zooparkının baş baytar həkimi bu müdaxiləni Liverpul Universitetinin onkoloqları ilə birlikdə həyata keçirib.

20 il əvvəl zooparka gətirilərkən sənədlərində "J.F" baş hərfləri qeyd olunduğu üçün ikiqat "Oskar" mükafatı laureatı aktrisanın şərəfinə Jodi adlandırılan ilan əməliyyatdan sonra "möhtəşəm şəkildə sağalıb".

Doktor Eşpolun sözlərinə görə, Jodi əvvəlki "şövqünü" və "canlılığını" bərpa edib və "residivin heç bir əlaməti yoxdur".

Piton artıq 20 ildən çox yaşı olan, öz növü üçün kifayət qədər yaşlı bir heyvan olsa da, baytar onun gələcəyi ilə bağlı nikbindir.

"Bu gün onun 23 yaşı var, buna görə də artıq müəyyən yaşa çatmış dişidir. Lakin ümid edirik ki, 30 yaşına qədər yaşayacaq; deməli, qarşıda hələ bir neçə ili var", – deyə Eşpol izah edib.

Qarşıda onu həm əhatəsində gəzmək, həm də elektrokimyaterapiya vasitəsilə xərçəngdən sağaldılan ilk ilan kimi tarixə düşmək üçün daha gözəl illər gözləyir.