Rumıniyanın Ukrayna və Moldova sərhədləri yaxınlığındakı hava məkanına daxil olan pilotsuz uçuş aparatı bu gün NATO missiyası çərçivəsində ölkədə xidmət aparan İspaniyaya məxsus qırıcı təyyarə tərəfindən vurulub.

“İki sahil” xəbər verir ki, bu barədə Rumıniyanın müdafiə naziri məlumat verib.

Nazirliyin bəyanatına görə, Moldovadan gələn PUA yerli vaxtla saat 05:01-də F-18 qırıcı təyyarəsi tərəfindən zərərsizləşdirilib.

Müdafiə Nazirliyi həmçinin Ukrayna sərhədi yaxınlığındakı Qalats bölgəsinin yaşayış olmayan ərazisinə PUA-nın qalıqlarının düşə biləcəyini bildirib.

19 milyon əhalisi olan Rumıniya Ukraynadakı müharibənin nəticələrindən ən çox təsirlənən NATO ölkələrindən birinə çevrilib. Qara dəniz sahili boyunca uzanan şərq sərhədi Rusiyanın mütəmadi zərbələr endirdiyi ərazilərə yaxın yerləşir.

NATO-nun şərq cinahında yerləşən digər ölkələr, o cümlədən Polşa və Baltik dövlətləri də dəfələrlə hava məkanlarının pozulması halları ilə üzləşiblər.

Cümə günü NATO Latviyanın hava məkanına daxil olan pilotsuz uçuş aparatının İtaliyaya məxsus qırıcı təyyarələr tərəfindən vurulduğunu açıqlamışdı.