Macarıstan Prezidenti Tamaş Şuyok özünün vəzifədən kənarlaşdırılmasını da nəzərdə tutan konstitusiyaya 17-ci düzəlişi imzalayıb.

“İki sahil” "Index"ə istinadən xəbər verir ki, bu barədə Şuyok öz videomüraciətində bildirib.

Qeyd olunub ki, qərardan əvvəl aylarla davam edən siyasi və konstitusiya-hüquq müzakirələri aparılıb. Respublika Prezidentinin qəbul edilmiş düzəlişi imzalamaq üçün beş gün vaxtı var idi, müddət bu gün başa çatırdı.

Şuyok bildirib ki, qüvvədə olan konstitusiyaya əsasən, onun "konstitusiya prinsiplərini pozan", lakin qanuni prosedur çərçivəsində təsis hakimiyyəti kimi Dövlət Məclisi tərəfindən qəbul edilmiş düzəlişə qarşı veto hüququndan istifadə etmək imkanı yoxdur.

"Mən hüquqi imkanlarımı diqqətlə götür-qoy etdikdən sonra və vicdanımın səsi ilə Əsas Qanunda təsbit olunmuş vəzifəmi yerinə yetirirəm", - o bildirib.

O həmçinin qeyd edib ki, təzyiqlərə baxmayaraq, konstitusiya quruluşundan və dövlət başçısı institutunun nüfuzundan çıxış edərək istefa verməyib. Hazırkı dövlət başçısı qeyd edib ki, 17-ci düzəliş Macarıstanın konstitusiya demokratiyasında dönüş nöqtəsi oldu. Şuyok əlavə edib ki, bu qərara və onun nəticələrinə görə müstəsna məsuliyyət Macarıstanın yeni hökumətinin üzərinə düşür.

Daha əvvəl Macarıstanın Baş naziri Peter Madyar prezidentin hakimiyyətdən kənarlaşdırılması ilə bağlı konstitusiyaya dəyişikliklər layihəsini parlamentə təqdim etmişdi.

Macarıstan parlamenti iyulun 13-də keçirilən iclas zamanı düzəlişi qəbul edib. O, prezidentin vəzifədən kənarlaşdırılmasını və 30 gün ərzində yenisinin təyin edilməsini, eləcə də deputatlıq müddətlərinin məhdudlaşdırılmasını nəzərdə tutur. Qanun layihəsi iclası boykot edən müxalifətin iştirakı olmadan qəbul edilib.