1993-cü ilin əvvəllərində Azərbaycan çox ağır və mürəkkəb bir vəziyyətlə üz-üzə qalmışdı. Ölkədə siyasi sabitlik pozulmuş, iqtisadi böhran dərinləşmiş, Ermənistanın hərbi təcavüzü nəticəsində torpaqlarımızın işğalı davam edirdi. Dövlət idarəçiliyində yaranmış problemlər, hakimiyyət uğrunda gedən mübarizə və müxtəlif silahlı qrupların fəaliyyəti ölkədə xaos və anarxiya mühiti yaratmışdı. Azərbaycan müstəqilliyini itirmək və parçalanmaq təhlükəsi ilə qarşı-qarşıya qalmışdı.

Belə bir şəraitdə ölkəni düşdüyü böhrandan çıxara biləcək, xalqın etimadını qazanmış, zəngin siyasi təcrübəyə malik nüfuzlu liderə ehtiyac duyulurdu. Xalq yaxşı anlayırdı ki, mövcud vəziyyətdən çıxış yolu yalnız dövlətçilik ənənələrini dərindən bilən, qətiyyətli və uzaqgörən siyasət yürüdə bilən rəhbərin hakimiyyətə gəlməsindən keçir. Məhz buna görə də milyonlarla insan öz ümidini görkəmli dövlət xadimi Heydər Əliyevə bağlamışdı.

Heydər Əliyev uzun illər ərzində qazandığı zəngin idarəçilik təcrübəsi, yüksək təşkilatçılıq qabiliyyəti və dövlət maraqlarına sadiqliyi ilə xalq arasında böyük nüfuz qazanmışdı. Onun rəhbərliyi dövründə Azərbaycan keçmiş ittifaq məkanında inkişaf edən respublikalardan birinə çevrilmiş, milli kadrların yetişdirilməsi, iqtisadiyyatın gücləndirilməsi və dövlətçilik ənənələrinin möhkəmləndirilməsi istiqamətində mühüm işlər görülmüşdü. Buna görə də ölkənin taleyinin həll olunduğu bir vaxtda xalqın seçimi məhz Heydər Əliyev oldu.

1993-cü ilin iyun hadisələri zamanı vəziyyət daha da gərginləşmişdi. Dövlət hakimiyyəti böhran içində idi, vətəndaş qarşıdurması təhlükəsi artırdı. Xalq və ziyalılar ölkənin gələcəyini düşünərək Heydər Əliyevin Bakıya dəvət olunmasını tələb edirdilər. Bu çağırışlar Azərbaycanın müxtəlif bölgələrində yaşayan insanların ortaq iradəsini ifadə edirdi. Hər kəs inanırdı ki, yalnız Heydər Əliyev ölkədə sabitliyi bərpa edə, dövlətçiliyi qoruya və xalqı bu çətin sınaqdan çıxara bilər.

Ulu Öndər xalqın etimadını doğruldaraq hakimiyyətə qayıtdıqdan sonra qısa müddət ərzində ölkədə sabitliyin təmin olunmasına nail oldu. Dövlət çevrilişi cəhdlərinin qarşısı alındı, qanunsuz silahlı birləşmələr zərərsizləşdirildi, dövlət idarəçiliyi gücləndirildi və Azərbaycanın müstəqilliyi qorundu. Beləliklə, nüfuzlu siyasi liderə olan ehtiyac Azərbaycanın xilası ilə nəticələndi və ölkəmizin inkişafının yeni mərhələsinin əsası qoyuldu.

Tarix sübut etdi ki, 1993-cü ildə Azərbaycan xalqının seçimi doğru olmuşdur. Heydər Əliyevin hakimiyyətə qayıdışı dövlətçiliyimizi məhv olmaq təhlükəsindən xilas etmiş, ölkənin gələcək inkişaf strategiyasını müəyyənləşdirmişdir. Bu gün əldə olunan uğurların təməlində də məhz həmin dövrdə qəbul edilmiş mühüm qərarlar və Ulu Öndərin uzaqgörən siyasəti dayanır.

Cahan Bayramlı,
YAP Xətai təşkilatının fəalı