Böyük Britaniya hökumətinin Peter Mandelsonun Böyük Britaniyanın ABŞ-dakı səfiri təyinatı ilə bağlı sənədlərin ilk hissəsini bu gün dərc etməsi gözlənilir.

“İki sahil” xəbər verir ki, bu barədə "The Guardian" qəzeti mənbələrə istinadla məlumat yayıb.

Sənədlər Peter Mandelsonun 2024-cü ildə Böyük Britaniyanın ABŞ-dakı səfiri vəzifəsinə təyin edilməsi ilə bağlı aparılan yoxlamanın nəticələrini əhatə edir. 2025-ci ilin sentyabrında Mandelson ətrafında qalmaqal yaranmışdı. Böyük Britaniyanın baş naziri Keir Starmer diplomatın amerikalı maliyyəçi Jeffrey Epstein ilə əlaqələri üzə çıxdıqdan sonra onu vəzifəsindən azad etmişdi.

Hökumətin açıqlamasında bildirilirdi ki, Ağ Ev tərəfindən açıqlanan yazışmalar Mandelson ilə Epşteyn arasında əvvəllər məlum olandan daha “dərin əlaqələrin” olduğunu göstərir.

Məlumata görə, dərc ediləcək ilk sənəd paketi Mandelsonun diplomatik vəzifəyə təyin edilməsi ilə bağlı aparılmış geniş yoxlamanın nəticələri barədə iki səhifəlik hesabatı ehtiva edəcək. Mənbələrin sözlərinə görə, sənəddəki məlumatlar baş nazir Starmerin həmin dövrdəki qərarının düzgünlüyünü sual altına qoya bilər. Bildirilir ki, Mandelson səfir təyin edilərkən Starmer onun Epşteynlə əlaqələri barədə artıq məlumatlı idi.

Həmçinin açıqlanacaq sənədlərdə Mandelsonun namizədliyi nəzərdən keçirilərkən ictimaiyyət üçün əlçatan olan məlumatlar, o cümlədən Epşteyn ilə keçmiş səfir arasında əlaqələrin miqyası barədə faktlar da yer alacaq.