Fransanın Səhiyyə Nazirliyi ölkə xəstəxanalarına yeni təlimat göndərib.

“İki sahil” xəbər verir ki, bu barədə "Le Canard Enchaine" qəzeti məlumat yayıb.

Təlimatda göstərilir ki, Fransa xəstəxanaları 2026-cı ilin martına qədər “mümkün böyük iştiraka”, yəni Avropada genişmiqyaslı hərbi münaqişəyə hazır olmalıdırlar.

Səhiyyə naziri Ketrin Vautrin tərəfindən təsdiqlənən sənəddə 2026-cı ilin mart ayına qədər həm fransız, həm də müttəfiq olmaqla minlərlə yaralı əsgərin qəbulu və müalicəsi üçün plan hazırlanmalıdır. Fransa qitədə vəziyyətin daha da gərginləşəcəyi təqdirdə yükü öz üzərinə götürərək “Avropanın xəstəxanası” kimi çıxış etməyə hazır olmalıdır.

Nazirlik hazırkı ixtisasından və fəaliyyət sahəsindən asılı olmayaraq, Ordu Səhiyyə Xidmətinə mülki həkimlərin cəlb edilməsinin mümkünlüyünü vurğulayır.

Səhiyyə mütəxəssislərinin resurs çatışmazlığı, xəstələrin sayının artması və münaqişənin Fransa ərazisinə hər hansı digər birbaşa və ya dolayı təsiri şəraitində işləməyə hazır olması gözlənilir.

Oxşar ssenarilər artıq bir neçə il əvvəl pandemiya ilə bağlı hazırlanıb. Burada söhbət xəstələrin kütləvi axınına tez reaksiya verə bilən infrastrukturun yaradılmasından gedir. Hər iki halda - pandemiyalar və müharibələrdə - səhiyyə sistemi milli davamlılığın əsas aləti kimi çıxış edir.

Səhiyyə Nazirliyi əsas nəqliyyat qovşaqlarında hərbi əməliyyatlardan qayıdan əsgərlərə yardım göstərə biləcək ixtisaslaşdırılmış tibb mərkəzləri yaratmağı planlaşdırır. Bu mərkəzlərin hər biri iki ay ərzində gündə yüzə qədər yaralı qəbul edə biləcək.

"Le Canard Enchaine" yazır ki, nəzərə alınan rəqəmlər Fransa səhiyyə sisteminin 10-180 gün ərzində xidmət etməli olduğu 10-50 min hərbi qulluqçudur. Bu, təkcə fransızlara deyil, həm də xarici hərbi qulluqçulara aiddir. 

Yaralıların müalicəsi üçün on minlərlə yerin hazırlanmasına dair göstəriş son illərdə Fransanın müdafiə siyasətinin ümumi xəttinə uyğun gəlir. Paris öz müttəfiqlərinə təkcə ordunun deyil, həm də NATO-nun arxa strukturlarının sabitliyinin qorunması üçün məsuliyyəti öz üzərinə götürməyə hazır olduğunu nümayiş etdirməyə çalışır.