Cəbrayıl şəhərinin işğaldan azad olunması Vətən müharibəsinin sonrakı gedişatına müsbət təsir göstərmiş və Ordumuzun zəfər əzmini daha da yüksəltmişdir. İşğalda olan digər ərazilərimiz kimi Cəbrayılda da erməni vandalizmi sərhəd tanımamışdır. Bütün şəhər yerlə yeksan edilmiş, cəmi iki bina qalmışdır ki, orada da erməni hərbçiləri yerləşmişdi. İşğaldan sonra Cəbrayıl rayonunda genişmiqyaslı bərpa-quruculuq işləri həyata keçirilir. İnfrastruktur layihələri uğurla və sürətlə icra edilir. Rayona qayıdacaq sakinlərin məşğulluğunu təmin etmək üçün tədbirlər görülür. Prezident İlham Əliyev Cəbrayıla hər bir səfəri zamanı müxtəlif təyinatlı müəssisələrin təməlini qoymuşdur. Ümumilikdə “Araz Vadisi Sənaye Zonası”nda 15-ə yaxın müəssisənin təməli qoyulub ki, artıq onlardan biri fəaliyyətdədir. Bir sözlə, insanların Cəbrayılda yaşaması və işləməsi üçün hər bir şərait yaradılır. Oktyabrın 4-də Prezident İlham Əliyev və birinci xanım Mehriban Əliyevanın açılışında iştirak etdikləri Cəbrayıl yaşayış kompleksi də bu qəbldəndir.

Səfər çərçivəsində Cəbrayıl şəhərində Mehdi Mehdizadə adına 960  yerlik tam orta məktəbin binasının, “Azərişıq” ASC-nin Zəngilan Elektrik Şəbəkəsinin Rəqəmsal İdarəetmə Mərkəzinin və Zəngilan rayonunda “AzərEnerji” ASC-nin “Sarıqışlaq” Su Elektrik Stansiyasının açılışı, Cəbrayıl şəhərində “Azərsun Holdinq” MMC-nin alkoqolsuz içki məhsulları istehsalı kompleksinin, “Hicaz quşçuluq” müəssisəsinin damazlıq yumurta istehsalı fabrikinin, “Araz Vadisi İqtisadi Zonası” Sənaye Parkında yeni müəssisələrin, Zəngilan şəhərində beşinci və altıncı yaşayış komplekslərinin təməlqoyma mərasimləri keçirilib. Ölkə başçısı həmçinin  Cəbrayıl rayonunun Horovlu kəndində fərdi evlərin və sosial obyektlərin, Zəngilan şəhərində 104 mənzilli yaşayış kompleksinin tikintisi və Zəngilan İstirahət Kompleksində aparılan tikinti işləri ilə tanış olub.
Ölkəmizin başçısı bildirib ki, bu Cəbrayılın azad olunmasının çox böyük əhəmiyyəti vardır: "Çünki İkinci Qarabağ müharibəsi dövründə işğalçılardan azad edilmiş birinci şəhər idi. O vaxta qədər artıq müharibə bir həftə idi ki, gedirdi və 20-yə yaxın kənd, o cümlədən, Cəbrayıl rayonunun kəndləri  azad edilmişdi,. Ancaq şəhər olaraq birinci şəhər Cəbrayıl olmuşdur və Cəbrayıl əməliyyatı xüsusi əhəmiyyətə malik idi. Ordumuz, Silahlı Qüvvələrimiz böyük peşəkarlıq, qəhrəmanlıq göstərmişdir və işğalçıları Cəbrayıl şəhərindən qovmuşdur. Allah bütün şəhidlərimizə rəhmət eləsin! Azərbaycan Silahlı Qüvvələri Vətən müharibəsində əsl qəhrəmanlıq, fədakarlıq, rəşadət göstərmişdir. Biz şəhidlərimizlə əbədi fəxr edəcəyik. Əlbəttə, Cəbrayıl şəhərinin azad olunması həm müharibənin sonrakı gedişatına müsbət təsir göstərmişdir, eyni zamanda, Ordumuzun və ümumiyyətlə, xalqımızın mənəvi ruhunu yüksəltmişdir.»

Yaşayış kompleksinin açılışı zamanı çıxışında Prezident İlham Əliyev tarixi Zəfərimizdən, işğaldan azad olunmuş ərazilərdə həyata keçirilən bərpa-quruculuq işlərindən, Qərbin ölkəmizə qarşı olan qərəzli, əsassız mövqeyindən geniş bəhs etdi. Ölkə başçısı vurğuladı ki, Ermənistan 30 il ərzində torpaqlarmızı işğalda saxladığı müddətdə bu ölkəyə qarşı  beynəlxalq aləm tərəfindən heç bir təsir və təzyiq olmadı. Minsk qrupu münaqişəni həll etmək əvəzinə erməni işğalına müəyyən dərəcədə bəraət qazandırmaqla və Azərbaycanı alçaldıcı sülhə təhrik etməklə məşğul idi. Ermənistan  hətta dünyanın bir nömrəli təşkilatı olan BMT-nin Təhlükəsizlik Şurasının qətnamələrinə də məhəl qoymurdu. Prezident İlham Əliyev bildirdi ki, Qərb zamanla ölkəmizi işğalla barışmağa çağırır, münaqişənin hərbi həllinin olmadığını qeyd edirdi. Fransa və onun kimi bəzi dövlətlər bu istiqamətdə əllərindən gələni edirdilər. Lakin Azərbaycan bütün təzyiqlərə rəğmən işğalla barışmadı və öz əzəli torpaqlarını düşmən tapdağından azad etdi. Bunla barışa bilməyən, Azərbaycanın qələbəsini həzm edə bilməyən Qərb dövlətləri bu gün ölkəmizə qarşı sanksiyalar tətbiq etmək istəyir, davamlı olaraq Ermənistanı silahlandırırlar. Erməniatanın təhlükəli oyunlara qoşulduğunu qeyd edən Prezident İlham Əliyev bu ölkəyə və havadarlarına çox ciddi xəbərdarlıq etdi.

Cəbrayıl yaşayış kompleksinin açılışı zamanı çıxışında Prezident İlham Əliyev ölkə gəncliyinə də xitab etdi. Ölkə başçısı bildirdi ki, gənc nəsil diqqətli olmalı heç bir vədə, heç bir yalançı ifadəyə inanmamalıdır. Bir halda ki, anti-Azərbaycan qüvvələrin hədəfi gənc nəslin şüurudur. Bunun üçün Azərbaycana qarşı olmazın yalanlar uydurur, öz mətbuatlarında və dırnaqarası qeyri-hökumət təşkilatlarında bu yalanları tirajlayırlar. Anti-Azərbaycan mövqeyində olan müxtəlif ünsürlər müxtəlif QHT-lər, hansısa ictimai qurumlar adı altında bu günə qədər maliyyələşdirilirlər. Məqsəd gənc nəslin şüuruna təsir edə bilməkdir. Odur ki, gənclər diqqətli olmalı, milli ruhda, vətənpərvərlik ruhunda tərbiyə olunmalıdırlar.  

Nazimə Şamıyeva,
YAP Füzuli rayon təşkilatının sədri