Ulu Öndər Heydər Əliyevin anadan olmasının 100 illiyinə həsr edilən tədbirlər davam edir. Mayın 8-də  Xətai Rayon İcra Hakimiyyətinin, Yeni Azərbaycan Partiyası Xətai rayon təşkilatının  və “Təhsil” RİM 3 saylı Şahmat Məktəbinin birgə təşkilatçılığı ilə Xətai rayon məktəbliləri  arasında Ümummilli Lider Heydər Əliyevin 100 illik yubileyinə həsr olunmuş şahmat idman növü üzrə yarış keçirilib. Yarışa Xətai rayonunun 37 məktəbinin şagirdləri qatılıblar.

Ulu Öndərin 100 illik yubileyi çərçivəsində keçirilən tədbirlərin hər biri dahi şəxsiyyətin bütün sahələrdə davamlı uğurların əldə edilməsi üçün möhkəm təməl yaratdığını bir daha təsdiqləyir.  Ümummilli Lider idmanın inkişafına daim böyük qayğı göstərib. Məhz Onun təşəbbüsü ilə respublikamızın şəhər və rayonlarında çoxsaylı uşaq-gənclər şahmat məktəbləri istifadəyə verilib. Ölkəmizdə güclü şahmat məktəbi yaradılıb. Bu proses bu gün də uğurla  davam edir. Şahmatın inkişafı dövlət başçısı İlham Əliyevin  diqqət mərkəzindədir. Dövlət tərəfindən göstərilən qayğı Azərbaycan şahmatçılarının beynəlxalq yarışlarda yeni qələbələr qazanmalarına zəmin yaradır. Ötən onilliklər ərzində Avropa, dünya çempionatlarında və bir sıra digər mötəbər turnirlərdə iştirak edən şahmatçılarımız böyük uğurlar əldə ediblər.

Yarışda I yeri  Heydər Əliyev adına Lisey, II yeri  17  saylı orta məktəb, III yeri  Hümanitar Fənlər Liseyi tutub.

Qaliblər  Yeni Azərbaycan Partiyası Xətai rayon təşkilatının   Ulu Öndər Heydər Əliyevin anadan olmasının 100 illiyi münasibətilə keçiriləcək ümumrayon tədbirində mükafatlandırılacaqlar.