Neft İxrac Edən Ölkələr Təşkilatına (OPEC) üzv ölkələr hasilatın azaldılmasına dair alınacaq qərar çərçivəsində ABŞ-ın sanksiya tətbiq etdiyi İrana güzəştə gedilməsi barədə razılığa gələ bilmir.

AZƏRTAC “Reuters”ə istinadla xəbər verir ki, neft istehsalının azaldılması baxımından OPEC-ə ən böyük maneəni məhz İran törədir.

Xatırladaq ki, İranın neft naziri Bijən Namidar Zəncənə ABŞ-ın rəsmi Tehrana tətbiq etdiyi sanksiyalarla əlaqədar OPEC-in neft istehsalının azaldılmasına dair alacağı qərar çərçivəsində ölkəsinə güzəşt olunmasını tələb edib: “Qeyri-qanuni sanksiyalar davam etdiyi təqdirdə İran gələcəkdə neft istehsalının səviyyəsinin azaldılmasına dair hər hansı qərardan azad olunmalıdır”.

O əlavə edib: “İrana qarşı sanksiyalar davam etdiyi təqdirdə bu ölkənin OPEC üzrə kvotası heç kimlə müzakirə olunmayacaq”.