Sentyabrın 11-də Yeni Azərbaycan Partiyası (YAP) Füzuli rayon təşkilatının XII konfransı keçirilib.

“İki sahil” xəbər verir ki, əvvəlcə xalqımızın Ümummilli Lideri Heydər Əliyevin abidəsi ziyarət edilib, abidənin önünə gül dəstələri düzülüb.

Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.

YAP Füzuli rayon təşkilatının sədri Nazimə Şamıyeva hesabat məruzəsi ilə çıxış edib. Qeyd olunub ki, təşkilat hesabat dövründə fəaliyyətini partiyanın qarşıya qoyduğu vəzifələrə uyğun qurub, rayon ərazisində partiya üzvlərinin ictimai-siyasi fəallığının artırılması, ideoloji prinsiplərin təbliği, qadın və gənclərin ictimai-siyasi proseslərdə iştirakının genişləndirilməsi istiqamətində ardıcıl iş aparıb.

Füzuli Rayon İcra Hakimiyyətinin başçısı Alı Alıyev çıxışında Yeni Azərbaycan Partiyasının ölkənin ictimai-siyasi həyatında aparıcı rolundan danışıb. O, Ulu Öndər Heydər Əliyevin müəyyənləşdirdiyi siyasi kursun Prezident İlham Əliyev tərəfindən uğurla davam etdirildiyini, Azərbaycanın möhtəşəm nailiyyətlər qazandığını bildirib.

YAP İdarə heyətinin üzvü, Ailə, Qadın və Uşaq Problemləri üzrə Dövlət Komitəsinin sədri Bahar Muradova Yeni Azərbaycan Partiyasının cəmiyyətdə fəal mövqeyindən, qadınların ictimai-siyasi proseslərdə iştirakının genişləndirilməsi istiqamətində görülən işlərdən bəhs edib. O, partiyanın VII qurultayından sonra fəaliyyətini daha səmərəli qurulması istiqamətində ardıcıl tədbirlərin həyata keçirildiyini vurğulayıb.

Şəhid anası Səridə Zalova, Füzuli Dövlət Dram Teatrı ərazi partiya təşkilatının sədri Azər Abbasov və Böyük Bəhmənli kənd 1 nömrəli tam orta məktəbin direktoru Solmaz Qənimətli şəhid ailələri və qazilərə göstərilən dövlət qayğısından, partiya təşkilatlarının yerli səviyyədə fəaliyyətindən və ictimai təşəbbüslərdə fəal iştirakın önəmindən danışıblar.

YAP Mərkəzi Aparatının Təşkilat şöbəsinin baş məsləhətçisi Rəşad Abbaszadə hesabat dövründə YAP Füzuli rayon təşkilatının ərazi partiya təşkilatlarının fəaliyyətinin daha da gücləndirildiyini, o cümlədən partiya üzvlərinin ictimai-siyasi fəallığının artırılması istiqamətində görülən işlərin əhəmiyyətini vurğulayıb.

Konfransda YAP Füzuli rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.

Sonda Yeni Azərbaycan Partiyasının Himni səsləndirilib.