Belçikanın paytaxtı Brüsseldə Azərbaycanın Müstəqillik Günü münasibətilə artıq ikinci dəfə keçirilən “Suqovuşan” adlı simvolik minifutbol turniri başa çatıb.
"İki sahil“ report-a istinadən xəbər verir ki, turnir NATO-nun mənzil-qərargahı komandasının qələbəsi ilə yekunlaşıb.
İkinci yeri “MADANI Heroes” komandası tutub.
“Madani” Azərbaycan mədəniyyət mərkəzinin rəhbəri Emin Əliyevin sözlərinə görə, burada toplanan iştirakçılar və qonaqlar təkcə futbol oynamaq üçün gəlməyiblər:
“Bu turnir səmimi şəkildə fəxr etdiyimiz birlik, idman ruhu və beynəlxalq dostluq ənənəsinin davamının göstəricisidir. Suqovuşan sadəcə coğrafi ad deyil, ümid, dözümlülük və qələbə simvoludur".
“Biz bu turnirə keçən il 12 komandanın iştirakı ilə başladıq. Lakin ötən müddət ərzində o, əhəmiyyətli dərəcədə böyüdü və indi tədbirimiz təkcə Belçikadan deyil, həm də Almaniya, Niderland, Lüksemburq və Fransadan olan digər diaspor icmalarının komandalarının iştirakı ilə parlaq bir hadisəyə çevrilib. Xüsusilə Brüsseldə yerləşən diplomatik missiyaların iştirakı ilə fəxr edirik və dəvətimizi qəbul edən hər kəsə minnətdarıq”, – o qeyd edib.
Yarışda Türkiyə, Qazaxıstan, Pakistan, Qırğızıstan, Tacikistan və Azərbaycan səfirliklərinin komandaları, həmçinin Azərbaycanın AŞPA-dakı nümayəndəliyinin əməkdaşlarının iştirakı ilə Strasburqdan olan komandalar iştirak ediblər.
E.Əliyev Azərbaycanın Belçika, Lüksemburq və Aİ-dəki səfirliyinə xüsusi minnətdarlığını ifadə edərk bildirib ki, diplomatik nümayəndəlik artıq ikinci ildir turnirin keçirilməsinə dəstək göstərir və onun uğurlu olması üçün çox səy göstərib.
Azərbaycanın Brüsseldəki diplomatik nümayəndəliyinin rəhbəri Vaqif Sadıxov öz növbəsində belə gözəl tədbirin təşkilinə görə "MADANI" platformasına təşəkkür edib, qardaş və dost ölkələr olan Qırğızıstan, Pakistan, Tacikistan, Özbəkistan, Qazaxıstan səfirliklərindən olan həmkarlarını və onların komandalarını salamlayıb, hamıya turnirdə uğurlar arzulayıb.
Turnirdə həmçinin uşaq komandaları da iştirak edib, onlar da yekunda kubok, medal və Azərbaycan simvolları olan xatirə hədiyyələri ilə təltif olunublar.
