Dünya xalqlarını düşündürən,  planetdə sülhün bərqərar olunması, silahlar üçün ayrılan vəsaitin insanların rahat, əmin- amanlıq şəraitində yaşamasına sərf olunması üçün bütün dövlətlər,  beynəlxalq  təşkilatlar... hər kəs terrorizmə qarşı  mübarizədə birləşməli, planetimizin gələcəyi üçün məsuliyyət daşımalıdırlar.

Çünki bir dövlətdə baş verən terror region,  bölgəni bürüyən kabus isə bütünlükdə  bəşəriyyət üçün təhlükədir. Bədniyyətli insanların müasir texnologiyalardan belə   istifadə etməklə törətdikləri   terror elə qorxulu dəhşətdir ki,  onların qanlı-qadalı nəticələrinin aradan qaldırılması bütün xalqların gücündən, qüvvəsindən istifadə etməklə  mümkündür. Təcrübə göstərir ki,  ən qüdrətli  dövlət də   nə qədər güclü müdafiə olunsa belə  terrora qarşı təkbaşına mübarizə apara bilməz.

2001-ci ildə Amerikada  qoşa  göydələnlərin  dağıdılması ilə müşahidə olunan hadisədən sonra ABŞ-ın yaratdığı beynəlxalq antiterror  koalisiyaya  qoşulan və illərdən bəri ermənilərin hərbi, ekoloji. mədəni və mənəvi  terrorundan əziyyət çəkən Azərbaycan     milliyyəti, vətəni olmayan terrorçuların hər aktını insanlığa, bəşəriyyətə qarşı yönəlmiş cinayət hesab edərək koalisiyanın üzvü kimi bu sahədə səylərini artırır.

Ən radikal  terror təşkilatları ilə birgə  dünyanın bütün bölgələrində insanları qətlə yetirən, şəhərləri dağıdan Ermənistanın qanunsuz silahlı qruplaşmaları ilə mübarizə aparır. İnsanların,   pulların, silahların, narkotik məhsulların qeyri-qanuni yolla nəqlinə qarşı mübarizədə, sərhəd təhlükəsizliyinin təmin olunmasında, terrorçuluq fəaliyyəti ilə məşğul olmaqda şübhəli bilinən qrupların və onların vasitəçilərinin aşkarlanmasında səyini artıran Azərbaycan bu sahədə peşəkarlıq  nümayiş etdirir.

İstər Avropa, istər Şərq və Qərb ölkələrində baş verən terrorlar bütünlükdə dünyamızın gələcəyi üçün risklər yaradır, təhlükəsizlik tədbirlərinin gücləndirilməsini  tələb edir. Özlərinin maraqları üçün terror təşkilatlarını maliyyələşdirən, silahlandıran, onların törətdikləri dağıntılara, günahsız körpələrin  ahılların ölümlərinə  biganə qalan “güclülər” qələbələrini gücsüzlərin tökülən qanları bahasına  qeyd etməkdən  zövq alırlar.

Ən təhlükəli virusdan da qorxulu olan ikili standartlar siyasətinin   tətbiqi ilə “soyuq müharibə” dövründə hakim olan ideologiyalar arası mübarizənin  artıq odlu silahların dili ilə  aparılması  ərazi münaqişələrini, “rəngli inqilablar”ın ünvanlarını çoxaldır, düşünülməmiş qloballaşma siyasəti, digər dövlətlərin və bütöv regionların inkişafını ləngidir, mədəni, dini, tarixi mənbələrə  əsaslanmayan saxta iddialar  konfliktlərin və qeyri-sabitliyin artmasına gətirib çıxarır. Mənafelərin kəskin toqquşması vahid iqtisadi şəraitə məhvedici təsir göstərir. Böhranın dərinləşməsi və beynəlxalq hüququn nəzarətindən kənarda qalan münaqişələrin əmələ gəlməsinə şərait yaradılması suveren milli qurumların inkişafı prosesinə hədsiz ziyan vurur, qarşıdurma vəziyyətində olan tərəflər arasında kompromislər axtarışı vəziyyəti son həddə qədər kəskinləşdirir. Beynəlxalq siyasətin  qarışıq, qlobal, çirkin proseslərini  Dağlıq Qarabağ müharibəsinin timsalında aydın hiss etmək mümkündür.  Dünyada  hegemonluq uğrunda mübarizədə qalib olmaq istəyən   “süper güc”lərin  müəlliflik etdikləri  ikili oyunlar sonda  terrorlar üçün münbit şərait yaradır.

Maliyyə və iqtisadi böhranın genişləndiyi müasir dünyamızda belə gərginliklərin yaranmasında, başqa dövlətlərdə və regionlarda yaranmış mürəkkəb problemlərlə bağlı qərarlar qəbul etmək hüququnun inhisarlaşdırılmasında Qərb,  Avropa təsisatları və təşkilatları da az rol oynamırlar.  Nəticədə isə qeyri-ənənəvi müharibə taktikası olan terror  genişlənərək beynəlxalq münasibətlərdə anarxiyanın, hüquq normalarının gücdən düşməsinə  səbəb olur. Qərbin  istənilən bölgədə  “rəngli  inqilab”ların təşkili üçün yaratdığı qiyamçılarının dəstəklənməsi, o dövlətin siyasi , iqtisadi inkişafına, ölkədəki proseslərə təsir və təzyiqlərini artırması münaqişələrin təməl prinsiplərindəndir.  Müsəlman dövlətlərində “xeyir-dua” verilən “ərəb bahar”ları, bir neçə  ölkənin  dağılmasına səbəb olan dövlət çevrilişlərinin acı nəticələri,  miqrantların üzləşdikləri ədalətsizliklər  bu gün də hiss olunmaqdadır. Müharibənin əsas məqsədi isə  dost olmayan dövlətin iqtisadi və maliyyə resurslarını tükətmək,  zəifləmiş ölkələri öz məqsədləri naminə  köləyə  çevirmək,  yeraltı, yerüstü resurslarını mənimsəməkdir. Nəticədə həm dost olmayan ölkə, həm də onu əhatə edən qonşu  dövlətlər zərər çəkir. Onlar müharibələr, terror dalğası, inqilablar, separatizm, etnik və dini təmizləmələr ilə üzləşirlər. İllərdən bəri belə təhlükələrlə  üz-üzə dayanan,  Ermənistanın terror təşkilatlarının törətdikləri qətliamların qurbanı olan soydaşlarımızın sayı  minlərlədir.

Soydaşlarımızın Qərbi Azərbaycandan sonuncu kütləvi deportasiyası zamanı ermənilərin törətdikləri vəhşiliklər alman faşistlərinin cinayətləri ilə müqayisədə  çox humanist görünür.   O   zaman 13-15 yaşlı uşaqları  dəmir borulara dolduraraq hər iki tərəfini bağlayan ermənilər ana ilə iki azyaşlı qızını quyuya ataraq zəhərli ilanların onları necə sancaraq əzabla öldürdüyünü zövqlə izləmişlər. Xocalı soyqırımı isə erməni qəddarlığının ölçüyəgəlməz vəhşiliyinin ifadəsi oldu. Terrorçuları maliyyələşdirməklə insanların qətlə  yetirilməsinə fitva verənlər  həm də Ermənistanı dəstəkləyənlərdir.  Çox təəssüf ki,  özlərinə vurulan “dəyənəyin” ağrısını hiss etdikdə  “beynəlxalq terrora qarşı mübarizə məqsədilə koalisiya” yaradanlar əslində  beynəlxalq terroru  maliyyələşdirib, silahlandırmaqla kifayətlənməyib, dini zəmində qarşıdurmaların yaranması üçün  formalaşdırdıqları  müxalif qüvvələri təlimatlandırır, daxili gərginliyi artırmaqla dövlət çevrilişləri üçün zəmin hazırlayır, terrorçu qruplardan vasitə  kimi istifadə edirlər. İşğal etdikləri ərazilərdən axan çaylara partladıcı yerləşdirməklə  azərbaycanlı azyaşlıları - Fariz Bədəlovu,  Aygün Şahmalıyevanı, balaca Zəhranı və nənəsini öldürən ermənilərin də sıralarında  çoxluq təşkil etdikləri terrorçular bu gün Türkiyəyə qarşı  Qərbin planlaşdırdıqları  əməliyyatlarda, silahlı basqınlarda qaniçən kimi insanları  qətlə yetirirlər. Suriyalı  miqrant, dənizdə boğulan 3 yaşlı Aylin Kürdinin  sosial şəbəkələrdə yayılan şəkilini məsxərəyə qoyan  terrorçuları dəstəkləyənlər Reyhanlıya atdıqları raketlər nəticəsində evində  öldürülən 17 yaşlı Fatmanın qətlinə də biganə qalırlar.  Terrorun butun hallarına qarşı mübarizəni bütün insanların gələcəyimiz qarşısında ən başlıca  vəzifəsi hesab edən Prezident İlham Əliyevin  “ Bizim aramızda bölüşdürəcəyimiz heç nə yoxdur. Hamımız eyni planetdə yaşayırıq. Bütün xalqlar sülh, əmin-amanlıq və təhlükəsizlik şəraitində yaşamağı, ailələrini qorumağı, övladlarını böyütməyi arzulayır. Bütün dinlər eyni dəyərləri - insanlıq, mərhəmət, həmrəylik və sülhü təbliğ edir. Bu gün dünyanın tələb etdiyi səylərimizin birləşdirilməsidir” sözləri  insanları bu qorxulu  kabusa qarşı mübarizədə fəal olmağa çağırışdır.

Bəllidir ki, daşnakların türklərə qarşı  yürütdüyü etnik təmizləmə siyasətinin əsasında ümumerməni maraqları dayanır. Aqressiv, milli emosiya ilə müşayiət olunan “vətən axtarışı” siyasəti həmişə onların ictimai şüurunda qan üzərində   formalaşıb. Onlar üçün vətən  stabil bir coğrafiya deyil, maddi maraqlarını təmin etdikləri ərazidir .  Ona görə də  digər millətləri qəbul etmək, beynəlmiləlçilik ruhu onlara yaddır. Daşnakların Türkiyəyə, Gürcüstana, Azərbaycana qarşı ərazi iddialarının əsasında da  “ vətənsizlik” amili dayanır.

Qardaş Türkiyənin illərdən bəri terrora qarşı apardığı mübarizənin hələ də davam etməsi məhz Qərbin və Avropanın terrorçulara göstərdikləri yardımlar səbəbindən bitmək bilmir. Qardaş ölkənin Suriya ilə sərhəd bölgəsində  toplanaraq    Türkiyənin şəhərlərinə bomba yağdıran  “Əl-Qaidə”, “İŞİD”, PKK, PYD kimi terror qruplarını maliyyələşdirən də  “terrora qarşı mübarizə məqsədilə koalisiya” yaradanlardır. 

Həqiqi mənada  terrora qarşı mübarizəsini  “Zeytun budağı” adlı  əməliyyatı ilə davam etdirən Türkiyəni bu yolundan çəkindirməyə çalışanlar yenə də   qardaş ölkəyə qarşı təzyiqlər göstərir,  terrorçu qrupları silahlandırır, günahsız insanların ölümünə səbəb olan kütləvi qırğınlar, ölkə daxilində təxribatlar törədir.   Hazırda dünya siyasətinin gündəmində olan Əfqanıstan və Suriyada baş verənlər də deyilənlərə  əyani sübutdur.

...2016-cı ildə  həmin dairələrin təlimatlarına uyğun İstanbulun Atatürk  hava limanında baş verən və kütləvi insan  qırğını ilə nəticələnən terrordan sonra Türkiyədə baş verən hərbi qiyam bir daha göstərdi ki, regionda  nüfuzu artan, siyasi sabitliyin  qorunmasına çalışan  bu dövlətin qüdrətindən təşvişə düşənlər ən çirkin vasitələrə belə əl atırlar.  Həmin ilin iyul ayının 15-16-da  Türkiyədə  dövlət çevrilişinə cəhdin qarşısının xalqın birlik və həmrəyliyi ilə alınması bu dövlətin yenilməzliyini, xalqın birliyini  təsdiqlədi.  Vətənə sadiq qalacaqları ilə bağlı  içdikləri hərbi anda xilaf çıxan müxtəlif rütbəli zabitlərin iştirakı və əmri ilə  baş verən dövlət çevrilişlərinə cəhdin qarşısının alınması, belə xəyanət yolunu tutanların həbs olunması  Türkiyənin qüdrətini təsdiqlədi.  O vaxt qiyam törədənlərin cəzalandırılmasını tələb edən milyonlar bu gün “Zeytun budağı” əməliyyatını  dəstəkləyir,  terrora qarşı mübarizə aparan  orduya könüllü qoşulmaq istəyənlərin sayı artır.

BMT-nin Bakıda keçirilən VII Forumunda  çıxış edən, terrordan ən çox əziyyət çəkən ölkə olan  Türkiyənin Prezidenti Rəcəb Tayyib Ərdoğan bildirdi ki, terrorun bütün formalarına qarşı mübarizədə zəfər ancaq ağıllara, qəlblərə, vicdanlara müraciət edərək əldə oluna bilər: “Dözümsüzlüyə, ayrı-seçkiliyə, ksenofobiyaya, müxtəlifliyə qarşı olan qorxuya qalib gəldiyimiz gün bu mübarizədə uğur əldə edə bilərik. Zorakılıq tərəfdarları dini dəyərləri təhrif etməklə yaratdıqları utopiyalarla gənc nəsillərə təsir göstərir, onları fəlakətə aparırlar. Bunun əvəzində yeni nəsillərə inancları, ədaləti və bərabərliyi əsas götürən həqiqi mesajları ən doğru şəkildə öyrətməliyik.”    R.T.Ərdoğan   Forum iştirakçılarına belə bir çağırış etdi ki,    müxtəlif dinlərin nümayəndələri olaraq, bunu bacardığımızda dünyanın hamımızın birlikdə yaşaya biləcəyi yer olduğu daha yaxşı anlaşılacaq. Gələcək nəsillərə daha gözəl bir gələcək miras qoymaq üçün səsimizi bu gündən ucaltmalı və dərhal fəaliyyətə başlamalıyıq.

Xuraman İsmayılqızı, “İki sahil”