Prezident İlham Əliyevin inaqurasiya mərasimindəki çıxışı proqram xarakterli idi və qarşıdakı dövrdə yeni hədəflərə dair konkret istiqamətləri özündə ehtiva edirdi. Məlumdur ki, 21 il əvvəl 2003-cü ildə prezident seçiləndə İlham Əliyev qarşıda duran məsələlərin həll ediləcəyini vəd etmişdi və son 20 ilin mənzərəsi onu deməyə əsas verir ki, dövlət başçımızın da söylədiyi kimi, bizim sözümüz imzamız qədər keçərlidir. 2018-ci ildə inaqurasiya mərasimində isə Prezident İlham Əliyev torpaqlarımızın azad ediləcəyini, Azərbaycanda separatizmə son qoyulacağını bəyan etmişdi. Məhz 2 il sonra 2020-ci ilin sentyabrında 44 günlük Vətən müharibəsində tarixi qələbə əldə olundu, Azərbaycanın ərazi bütövlüyü bərpa edildi.
Müharibədən ötən dövr ərzində isə Azərbaycan öz prinsipial mövqeyini davam etdirdi. Nəhayət, 2023-cü ilin sentyabrında antiterror əməliyyatı prosesin məntiqi sonluğu oldu. Beləliklə, Azərbaycanda separatizmə birdəfəlik son qoyuldu. 2024-cü il zəfər seçkilərində də xalq öz seçimini edərək, qalib liderə səs verdi. Bununla da qalib xalq və ölkə olaraq qarşımızda yeni dövr və vəzifələr durur. Prezident İlham Əliyevin bəyan etdiyi kimi, qarşıdakı mərhələdə güclü ordu quruculuğu davam etdiriləcək, hərbi sənayenin inkişafının 2-ci mərhələsinin icrası başlayıb. Bu gün əsas hədəfimiz yeni reallıqlarla əlaqədar sərhədlərimizin təhlükəsizliyinin gücləndirilməsi, yeni sərhəd infrastrukturunun yaradılmasıdır. Müzəffər Ali baş Komandanın da söylədiyi kimi, bu, Azərbaycanı xarici risklərdən qorumaq üçün ən vacib şərtlərdən biridir.
Təbii ki, yeni hədəflərimizdən biri də ideoloji bütövlük və tamlıq, cəmiyyətimizin xaricdən gələn ideoloji basqılara davamiyyətinin artırılmasıdır. Dövlət başçımızın bu mənada prosesin aparıcı komponenti kimi gənc nəslin müsbət keyfiyyətlərini qabartması və gözləntiləri bəyan etməsi təsadüfi deyildi. Xüsusilə kənar qüvvələrin təsirlərinin neytrallaşdırılmasında şübhəsiz ki, gənclərimizin milli ruhda, ənənəvi dəyərlər əsasında tərbiyə edilməsi olduqca vacibdir. Müzəffər Ali Baş Komandan yad dəyərlərin tamamilə cəmiyyətimizdən silinməsinin hər bir ailənin, o cümlədən də dövlətin qarşısında əsas vəzifə olduğunu bəyan etdi. Bu məsələdə cəmiyyətdən əsas gözlənti həmrəylik nümayiş etdirməkdir. Çünki biz bu vaxta qədər əldə etdiyimiz bütün uğurları cəmiyyət olaraq sərgilədiyimiz həmrəylik hesabına əldə etmişik. Yeni inkişaf mərhələsində bu proses daha da güclənməli, daha güclü Azərbaycan naminə hər bir fərd üzərinə düşən vəzifəni layiqincı icra etməlidir. Güclü dövlət, güclü xalq və güclü lider tandemi bizi yeni mərhələdə bütün hədəflərə çatmağımıza zəmin yaradır.
Könül Nurullayeva,
Milli Məclisin deputatı
