Azərbaycanın Avropa Şurası Parlament Assambleyası (AŞPA) kimi qeyri-ciddi və qərəzli təşkilatla əməkdaşlığını dayandırması son günlərdə daha radikal, anti-Azərbaycan mövqeyini bildirən korrupsioner quruma əsl türklərə layiq paşa şilləsi oldu.
Mənliyini, milli təəssübünü avropalı havadarlarına satan xəyanətkarlar
Amma xarici düşmənlərimizdən daha artıq xalqımıza düşmən olan, elə Avropanın küçələrində gün keçirib, uğurlarımızı həzm edə bilməyən antimilli satqınlarımız Azərbaycanın AŞPA-dakı nümayəndə heyətinin qərəzli qurumla əməkdaşlığı qeyri-müəyyən müddətə dayandırması xəbərini sevinclə qarşıladılar. AXCP, Müsavat funksionerləri, radikal dairələrin əlində oyuncaq olan ermənipərəst qaragüruhçular, xarici ölkələrin zibilxanalarında gün keçirənlər yenə də “Azərbaycanın zərərinə olanlar bizim xeyrimizədir” şüarlarını səsləndirirlər. Azərbaycanın qətiyyətinin rəmzi olan bu seçimi özlərinə məxsus bataqlıq təfəkkürü ilə “qiymətləndirərək” sosial şəbəkə ünvanlarını iyrənc açıqlamaları ilə qaraldırlar. AXCP sədri Əli Kərimlinin «Biz Avropadan uzuqlaşdıqca , Ermənistanın dostları artacaq. Bizim Avropa ilə «döyüşməyimiz» Ermənistanın müttəfiqlərini çoxaldacaq» sözlərinə diqqət yetirək. Mənliyini, milli təəssübünü çox sevib qürurlandığı avropalı havadarlarına satan xəyanətkar Əli Kərimliyə xatırladaq ki, sənin kimi dostu, canıyananı, qanı, canı bir olan Ermənistana əlavə müttəfiq gərək deyil. İkinci Qarabağ müharibəsində qazandığımız Qələbəni kədərlə qarşılayan, Silahlı Qüvvələrimizə şər-böhtan yagdıran, şəhidlərimizin ruhu qarşısında xəcalət çəkməyən Əli Kərimli kimilər üçün Vətən, yurd sevgisinin heç bir anlamı yoxdur.
Azərbaycan haqqında əsası olmayan yalanları, böhtanları AŞPA kimi digər təsisatlara satan «əlilərin» paylaşdıqları açıqlamalarında utanmadan «xalqa hörmət» ifadəsini işlətməyə haqları yoxdur. Çünki onlar xalq arasında lənətlənən simasızlardırlar.
AXCP ünsürlərinin platforması AŞPA, Avropa Parlamenti kimi xəyanət, ikili standartlar zibilliyidir
AXCP Ali Məclisinin sədri Nurəddin Məmmədli radikal, cılız düşüncəsi, anti-Azərbaycan ruhu ilə sədrindən geri qalmır. Onun Azərbaycan nümayəndə heyətinin haqsızlığa qarşı qətiyyətini biabırçılıq adlandıraraq , «neqativ» nəticələrdən söz açması gülüncdür. Utanmadan «Ermənistan revanşistlərin gücünün artdığı» ifadəsini işlədən, ölkəmizin siyasi iradəsini, qətiyyətini, milli qürurunu anlamayan «yurd şefi»nin dəstəkçisinin Azərbaycan üçün “platforma” axtarması gülüncdür. Bu zat unudur ki, Qoşulmama Hərəkatı kimi təsisata sədrliyi müddətində qurumda apardığı islahatları ilə hamını heyran edən Azərbaycanın təşəbbüsü ilə yaradılan siyasi, iqtisadi, humanitar platformalarda neçə-neçə dövlət və hökumət başçıları Prezident İlham Əliyevlə həmrəyliklərini etiraf edirlər. AXCP ünsürlərinin platforması isə qarşılarında boyun bükdükləri AŞPA, Avropa İttifaqı, Avropa Parlamenti kimi xəyanət, ikili standartlar zibilliyidir.
AXCP Rəyasət Heyətinin üzvü İlham Hüseynin Azərbaycanı «qaranlıq ölkə» adlandırması korluq əlamətidir. Bu qargüruhçuya siyasətlə məşğul olmaq əvəzinə oftalmoloqa müraciət etməsini, arada bir eynəklə də olsa Azərbaycanın simasına heyran qaldığını bildirən xarici qonaqların ölkəmizlə bağlı dedikləri xoş sözləri oxumağı tövsiyə edirik. Ümumiyyətlə sosial şəbəkələri zəbt edən AXCP-nin ünsürləri- Məmməd İbrahim, Aqil Əli Məhərrəm kimi digərləri də ürəklərindəki Vətənə xəyanət çirkablarını, pasların açıqlayıblar. Əli Kərimlinin xəyanətkarlığının hiss olunduğu bütün açıqlamalarında duyulan AŞPA, erməni sevgisinin qarşılığı təbii ki, qulların xidmətinə verilən qəpik –quruş olacaq.
Gültəkin Hacıbəylidən soruşmaq lazımdır ki…
«Milli Şura»nın Koordinasiya Mərkəzinin üzvü Gültəkin Hacıbəyli də məsələyə münasibətini bildirib. Bu məqamda bir vaxtlar AŞPA-da Azərbaycanı təmsil edən bu şəxsdən soruşmaq lazımdır ki, bu qurumun saxtakarlığını hamıdan artıq sən hiss etmisən. Azərbaycan naminə heç bir iş görüb, təşəbbüs qaldırmamısan, indi niyə qaşıq aşdan isti oldu.
«Bizə xor baxanlar, torpağımıza göz dikənlər, uğurumuzu həzm edə bilməyənlər heç vaxt unutmasınlar ki, «dəmir yumruq»” yerindədir və hər zaman yerində olacaq! Heç kim bizimlə diktat və ultimatum dili ilə danışa bilməz! Bunu heç kim unutmasın! Heç kim onu da unutmasın ki, Qarabağ Azərbaycandır!» söyləyən Prezident İlham Əliyevin vurğuladığı kimi, artıq Qarabağ problemi həll olunub. Azərbaycan Bayrağı ölkənin bütün ərazisində dalğalanır. Qərbi, Avropanın ermənipərəst, islamofob qüvvələrini təşvişə salan da budur. Ona görə də ölkəmizə qarşı qərəzli olan, siyasi riyakarlıqdan əl çəkə bilməyən AŞPA kimi beynəlxalq qurumlardan istifadə bumeranq effekti yaradacaq. İslamofob, türkofob siyasətinin önündə gedən AŞPA-nın, Avropa İttifaqının rəsmilərinin özlərini yormağa ehtiyac yoxdur. Nə qədər riyakarlıq, saxtakarlıq, təhdid və təzyiq etsələr də qazanan Azərbaycan reallığı, demokratiyası, xalqımızın birliyi olacaq. 50 milyonluq Azərbaycan xalqının səsini susdurmağa heç kimin gücü çatmaz!
Xuraman İsmayılqızı, «İki sahil»
