Siyasi şərhçilərin fikrincə, bu ölkəni Suriyanın və Ukraynanın taleyi gözləyir
Ermənistanda anti-Rusiya ovqatı hər gün yüksəlir. Erməni saytları bu ölkənin əleyhinə silsilə yazılar dərc edir, siyasətçilər, ziyalılar isə tez-tez Rusiyanı ittiham edən açıqlamalar verirlər. Xüsusilə Ermənistanın baş naziri Nikol Paşinyan son dövrlər anti-Rusiya çıxışlarını açıq mətnlə ifadə edir. O cümlədən bu ölkə artıq Kollektiv Təhlükəsizlik Müqaviləsi Təşkilatının (KTMT) təlimlərindən də imtina edib. Əvəzində ABŞ-la birgə təlimlər keçirir və Avropa İttifaqı (Aİ) müşahidə missiyasına üstünlük verir. Yəni, rəsmi İrəvan Azərbaycanla sərhəddə gərginlik iddiasını ortaya ataraq hər vəchlə Aİ-nin Ermənistanda missiyasının genişlənməsinə çalışır.
Erməni mediasında yer alan xəbərlərə görə, Avropa İttifaqının müşahidə missiyası Tavuş vilayətinin İcevan şəhərində əməliyyat mərkəzi açıb. Bu barədə qurumun hesabında məlumat yerləşdirilib. Lakin bazanın hansı işləri aparacağı, hansı əməliyyatları icra edəcəyi açıqlanmır. Bu, artıq Aİ-nin Ermənistandakı üçüncü mərkəzidir. Sonuncu avqust ayında Qafanda açılmışdı. Aİ-nin Ermənistandakı müşahidə missiyasının sayının artırılmasının yalnız bir məqsədi var - KTMT-dən uzaqlaşmaq, ardınca da rus qoşunlarının Ermənistandan çıxarılmasına başlamaq. Ermənistanda Rusiya və onun himayəsində olan təşkilatlara inam və etibarın minimuma enməsinə səbəb kimi Azərbaycanla İkinci Qarabağ müharibəsində lazımi dəstəyin olmaması göstərilir. Halbuki, bu barədə KTMT-nin Nizamnaməsində belə bənd var ki, təşkilat yalnız üzv dövlətlərin ərazisinə hücum olarsa hərbi müdaxilə etmək zərurəti yaranar.
Hətta İkinci Qarabağ müharibəsində Ermənistanın sərhəddə gərginlik yaratmaqla KTMT-ni münaqişəyə cəlb etmək kimi məkrli planı da baş tutmadı. Məhz bundan sonra Ermənistan hakimiyyəti Rusiya və onun himayəsi ilə qurulan bir çox təşkilatlardan qeyri-rəsmi formada imtina etməyə başladı. Əvvəlcə baş nazir Nikol Paşinyanın yaxın ətrafına daxil olan məmurlar, sonra isə özü dəfələrlə bu quruma üzvlüyün əhəmiyyətsizliyini vurğuladılar. Baş nazir sonuncu müsahibələrində daha irəli gedərək bu təşkilatın Ermənistanın maraqlarını qorumaq iqtidarında olmadığını bəyan etdi.
Bəli, geosiyasi kursunu dəyişən rəsmi İrəvan artıq Avropa İttifaqına daxil olan ölkələrlə yaxınlaşır, təşkilatın Ermənistan ərazisində missiyasını genişləndirməyə çalışır. Amerikalı milyarder Corc Sorosun planına uyğun olaraq ABŞ-la əməkdaşlığın genişləndirilməsi, hətta onunla birgə hərbi təlimlər keçirilməsi də bu planın tərkib hissəsidir.
Ermənistanın KTMT-dən uzaqlaşmağa çalışmasının daha bir nümunəsi bu ölkənin təşkilata hələ də nümayəndə təyin etməməsidir. Əvəzində Ermənistanın bu təşkilatdakı keçmiş xüsusi nümayəndəsi Viktor Biyaqov Haaqada xüsusi nümayəndə təyin edilib. Məlumdur ki, Rusiyanın inhisarındakı KTMT təkcə postsovet məkanında nəzarəti əldə saxlamaq üçün yaradılmayıb. Bu, həm də NATO-ya alternativ kimi yaradılıb. Rusiyada etiraf edirlər ki, uzun illər təşkilatda çalışan, onun bütün planlarından və strategiyasından xəbərdar olan Viktor Biyaqovun Avropaya göndərilməsi ermənilərin KTMT-yə vurduğu növbəti zərbədir.
Paşinyan hakimiyyəti bu qənaətdədir ki, Ermənistanın Rusiyadan asılılığı ən yüksək həddədir və bundan yaxa qurtarmaq lazımdır. Onun qənaətincə, Rusiyanın yerini Qərb və digər tərəfdaşlar tutmalıdır. Bir sözlə, ermənilər artıq Rusiyanı tərəfdaş kimi görmür və onu satqın hesab edirlər. Əslində, Ermənistanın Rusiyadan asılılığa son qoyması heç də asan məsələ deyil. Ona görə ki, Ermənistana təkcə hərbi deyil, həm də iqtisadi cəhətdən də Rusiyadan asılıdır. Burada ən böyük istehsalat müəssisələrindəki payın böyük hissəsi Rusiyanın əlindədir.
Bundan başqa, anti-Rusiya cəbhəsinin lideri Nikol Paşinyan, indi eyni zamanda, Rusiyapərəst müxalif qüvvələrlə də mübarizə aparır. Yəni, bu işdə Paşinyana sadəcə rəhbəri olduğu azsaylı Soros komandası dəstək verir. Bütün bunların fonunda ölkədəki Rusiyanın təsiri altında olan qüvvələr də xeyli fəallaşıblar.
Bu gün ermənilər gərgin günlərini yaşayırlar. Çünki Ermənistan mövcud olduğu gündən bəri ilk dəfədir ki, ağasına- forpostu olduğu Rusiyaya qarşı soyuq müharibə elan edib. Hətta yaxın gələcəkdə hayların MDB və Avrasiya İqtisadi İttifaqından da imtina edəcəkləri gözlənilir. Bu barədə ötən günlərdə, Sankt-Peterburqda keçirilən Avrasiya İqtisadi İttifaqı iclasında Nikol Paşinyan bu təşkilatın siyasiləşdirilməsinin əleyhinə çıxış edərək eyham vurdu ki, bu təşkilat da artıq Ermənistan üçün maraqlı deyil. Analitiklərin fikrincə, Rusiya Ermənistanın bu və digər nankorluğunu cavabsız qoymayacaqdır.
Xüsusilə hazırda Avropa İttifaqının, xüsusilə də ABŞ-ın Ukraynaya maliyyə və hərbi istiqamətlərdə ki, yardımlarında axsamaların olması Rusiyanın cəbhə bölgəsində güclənməsinə şərait yaradır. Bu proses indi bütün dünyanın diqqət mərkəzindədir. Hətta Qərbə meyilli ölkələrin də davranışlarında bir qeyri-müəyyənlik yaşayır. Xüsusilə bir neçə ildir ki, anti-Rusiya xətti yürüdən Ermənistanda artıq anlayırlar ki, ölkələrinin bu addımı vaxtından əvvəl başlamış prosesdir və bu dəyməmiş meyvənin dərilməsi kimi bir şeydir ki, onun da heç kimə faydası olmaz…
Elçin Zaman, «İki sahil»
