Azərbaycan qüdrətli , güclü, sülhsevər bir ölkə kimi Cənubi Qafqazda, eləcə də beynəlxalq aləmdə tanınır. Azərbaycanın xarici siyasət fəaliyyətinin formalaşması və prioritet vəzifələrin müəyyənləşməsi Ulu Öndər Heydər Əliyevin adı ilə bağlıdır. Məhz Heydər Əliyevin rəhbərliyi dövründə Azərbaycanın beynəlxalq münasibətlər sistemində iştirakı və özünəməxsus mövqelər qazanması üçün lazımi tədbirlər görülmüşdür.
1991-ci ildə öz müstəqilliyini bərpa etdikdən sonra Azərbaycan Respublikası bir sıra əhəmiyyətli beynəlxalq və regional təşkilatlarla əməkdaşlıq siyasətini həyata keçirmişdir. 1992-ci il martın 2-də Azərbaycan BMT-in üzvlüyünə qəbul edilib. Elə həmin ilin iyun ayında öz üzvlərinə dünya səviyyəli mütəxəssislərin, texniki yardımların, həmçinin elm və pedaqoji kadrların hazırlanması, qlobal elmi layihələrdə iştirak etmək imkanlarından bəhrələnmək imkanı verən UNESCO ilə əməkdaşlıq etmək qərarına gələn Azərbaycan Respublikası həmin təşkilata daxil olmuşdur. Azərbaycan 2007-2008, 2012, 2016 və 2020-ci illərdə GUAM-da sədrlik etmişdir.
Azərbaycan Respublikası regional və qlobal səviyyədə fəaliyyəti , o cümlədən beynəlxalq arenada əməkdaşlığı genişləndirərək 26 may 2011-ci il tarixində İndoneziyanın Bali adasında Qoşulmama Hərəkatına üzv olan dövlətlərin yekdil dəstəyini əldə edərək , bu beynəlxalq təşkilata tamhüquqlu üzv qəbul olunmuşdur.
Əsası Ulu Öndər Heydər Əliyev tərəfindən qoyulmuş Azərbaycanın dünya birliyinin layiqli üzvünə çevrilməsi yolunda işlər Prezident İlham Əliyev tərəfindən layiqincə davam etdirilir. Son 20 ildə həyata keçirilən xarici siyasət ölkəmizlə əməkdaşlıq etmək istəyən dövlətlərin sayını artırdı, respublikamızın beynəlxalq aləmdəki reytinqini yüksəltdi və Azərbaycan dünyanın inkişaf etmiş demokratik dövlətləri sırasına qoşuldu.
Prezident İlham Əliyevin rəhbərliyi ilə həyata keçirilən çoxşaxəli və balanslaşdırılmış xarici siyasət kursu ölkəmizin milli dövlət kimi müasir beynəlxalq münasibətlər sistemində gücünü və nüfuzunu artıran mexanizm qismində çıxış etməkdədir. Ölkəmizin beynəlxalq miqyasda etibarlı tərəfdaş olması, dünyada hörmət qazanması və nüfuzlu beynəlxalq təşkilatların layiqli üzvünə çevrilməsi dövlət başçımızın düşünülmüş strategiyasının məntiqi nəticəsidir.
Azərbaycan BMT Təhlükəsizlik Şurasına qeyri- daimi üzvlüyü zamanı 155 ölkənin , Qoşulmama Hərəkatına sədrliyi zamanı 120 ölkənin dəstəyini qazanmağı bacarıb və etimadı tam doğruldub. Bütün postsovet məkanında ilk dəfə olaraq Azərbaycan Respublikasının 2024-cü ildə İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına -COP-29-a ev sahibliyi etməsi Azərbaycanın dünyada getdikcə güclənən mövqeyinin, artan nüfuzunun əyani göstəricisidir.
Ətraf mühit , iqlim məsələləri milli sərhədlər tanımır, ümumbəşəri mahiyyətlidir. Onların qorunması planetimiz—ümumi evimiz üçün çox vacibdir. Məhz buna görə də 2020-ci ildə 44 günlük müharibədən dərhal sonra Prezident İlham Əliyev Qarabağı və Şərqi Zəngəzuru , Naxçıvanı “ yaşıl enerji bölgəsi” adlandırıb və bu istiqamətdə genişmiqyaslı işlərə başlanıb. Neft-qaz ölkəsi olan Azərbaycan yaşıl enerji növlərinin yaradılmasını və yaşıl enerjinin dünya bazarına nəqlini hazırda enerji siyasətinin yeni prioritet istiqaməti kimi müəyyən edib.
Qeyd etmək lazımdır ki, COP-29 eyni zamanda sülhə, əmin-amanlığa yol açır, rifaha xidmət edir. COP həmrəylik, qlobal məsuliyyəti bölüşmək və əməkdaşlıq platformasıdir. Azərbaycanın COP- 29-a ev sahibliyi etməsi isə Prezident İlham Əliyevin yürütdüyü siyasətə dünya səviyyəsində olan böyük hörmətin nəticəsidir.
Prezident İlham Əliyev Azərbaycan Televiziyasına müsahibələrinin birində demişdir: “Azərbaycan dünya miqyasında çox böyük hörmətə və yüksək imicə malik olan ölkədir .” Bəli əminliklə demək olar ki, Prezidentimiz cənab İlham Əliyevin rəhbərliyi ilə Azərbaycan bundan sonra da bütün sahələr üzrə inkişafını davam etdirəcək, çünki ölkəmiz müstəqil siyasət yeridir, heç bir dövlətdən asılı deyil və kimsənin də diktəsi ilə hərəkət etmir. Ən əsası isə ölkədə “ xalq-iqtidar “ birliyi var. Məhz buna görə də xalqımız gələcəyə çox böyük nikbinliklə baxır.
Elnarə Qocayeva,
Bakı şəhəri, Xətai rayonu, T. Bağırov adına 59 nömrəli tam orta məktəbin Azərbaycan dili və Ədəbiyyat müəllimi,
YAP Xətai rayon təşkilatının üzvü