Fransanın Yvelin departamentində yerləşən Trappes və La Verrier şəhərlərində baş verən silahlı hücum nəticəsində bir nəfər həlak olub, bir neçə nəfər isə ağır yaralanıb. Hadisəni törətməkdə şübhəli bilinən 39 yaşlı Kevin T. polis tərəfindən saxlanılıb. Hücumun mümkün irqi motivləri araşdırılır.

“İki sahil” xəbər verir ki, Fransanın daxili işlər naziri hadisəni “qanlı hücum”, Yelisey sarayı isə “irqçi terror aktı” kimi qiymətləndirib. Şübhəli cümə günü səhər saatlarında avtomobilindən avtomat silahla atəş açıb. Yaralılar arasında vəziyyəti ağır olan 12 yaşlı qız da var.

Kevin T. Yvelin departamentinin Plezir kommunasında yaşayır. O, daha əvvəl, xüsusilə yol hərəkəti qaydalarını pozduğuna görə hüquq-mühafizə orqanlarının diqqətini cəlb edib. Bununla belə, kəşfiyyat xidmətlərinin məlumat bazalarında onun barəsində məlumat olmayıb. Şübhəli qonşu Kuanyer kommunasında saxlanılıb. Onun 66 yaşlı anası da könüllü olaraq polisə müraciət edib.

Saxlanılarkən şübhəlinin üzərində avtomat silah və gözyaşardıcı qaz qumbaraları olub. Onun Plezirdəki mənzilində partlayıcı təhlükəsi ilə əlaqədar xüsusi əməliyyat keçirilib.

Fransanın Milli Antiterror Prokurorluğu (PNAT) istintaqa cəlb olunub. İş üzrə terror fəaliyyəti ilə əlaqəli qəsdən adam öldürmə, habelə zərərçəkmişlərin irqi, etnik, milli və ya dini mənsubiyyəti ilə bağlı ağırlaşdırıcı hal daxil olmaqla, bir sıra hüquqi tövsiflər nəzərdən keçirilir.

Trappes şəhərinin meri Ali Rabeh həlak olan şəxsin Afrika mənşəli olduğunu, həyati təhlükəsi olan vəziyyətdə xəstəxanaya yerləşdirilən şəxsin isə Məğrib mənşəli olduğunu bildirib. La Verrier şəhərinin meri də yaralılar arasında Afrika mənşəli iki təmizlik işçisinin olduğunu qeyd edib.

İstintaqın əsas məqsədlərindən biri qurbanların mənşələrinə görə hədəf seçilib-seçilmədiklərini, yoxsa şübhəlinin qarşısına çıxan insanlara fərq qoymadan atəş açdığını müəyyənləşdirməkdir.