Süni intellektin (Sİ) işlənilməsi zamanı təhlükəsizlik tədbirlərinin gücləndirilməsi tərəfdarları ABŞ-dakı cari seçki dövründə bu texnologiyanın tənzimlənməsini müdafiə edən namizədlərin dəstəklənməsinə 48 milyon dollar xərcləyiblər.
“İki sahil” xəbər verir ki, bBu barədə "Axios" portalı mənbələrə istinadla məlumat verib.
"Əgər siyasətçilər özlərinə qarşı çox zəngin və amansız bir siyasi qüvvənin çıxış etməyə hazır olduğunu hiss edib heç nə deyə bilməyəcəklərini düşünürlərsə, bu, məni prosesə müdaxilə etməyə sövq edir", — deyə "Calibrated Markets" investisiya fondunun idarəçisi Ceykob Eliosof bildirib.
Onun sözlərinə görə, o, kriptovalyuta sənayesi vəsaitlərinin tənzimləmə məsələlərində namizədlərin mövqeyinə qeyri-mütənasib dərəcədə böyük təsir göstərdiyi 2024-cü il vəziyyətinin təkrarlanmasını istəməzdi.
Kampaniyanın nəzərəçarpan iştirakçılarından biri Sİ-nin təhlükəsizlik tədbirlərinin və tənzimlənməsinin gücləndirilməsini müdafiə edən "Guardrails Alliance" siyasi komitəsi olub. Texnologiya sahəsinin işçiləri tərəfindən dəstəklənən təşkilat 11,7 milyon dollar vəsait cəlb edib.
Onun mövqeyi Sİ-nin sürətli inkişafını və daha az sərt məhdudiyyətləri müdafiə edən texnologiya şirkətlərinin rəhbərləri və investorlar tərəfindən dəstəklənən "Leading the Future" siyasi komitəsinin yanaşmasına tam ziddir. "OpenAI" şirkətinin prezidenti Qreq Brokman şirkət əməkdaşlarının belə bir addıma qarşı çıxmasından sonra bu komitənin xeyrinə nəzərdə tutulan 25 milyon dollar məbləğindəki ikinci ianədən imtina edib. İkinci rübün sonuna olan məlumata görə, "Leading the Future" komitəsinin hesablarında 31 milyon dollardan çox vəsait olub. Komitə Demokratlar Partiyasından 15-dən çox, Respublikaçılar Partiyasından isə 25-dən çox namizədi dəstəkləyib. Bununla yanaşı, tənzimləmə tərəfdarları cari seçki dövrünün namizədlərin bu məsələdəki mövqeyinin səsvermənin nəticələrinə təsir edib-etməyəcəyini göstərəcəyinə ümid edirlər.
