Kosta-rikalı diplomat və ölkənin sabiq vitse-prezidenti Rebekka Qrinspan BMT baş katibi postu uğrunda mübarizədə liderə çevrilib.

“İki sahil” "The Guardian"a istinadən xəbər verir ki, BMT Təhlükəsizlik Şurasının ilk gizli səsverməsində Qrinspan 10 lehinə və 1 əleyhinə səs alıb.

Qərb diplomatlarından biri bildirib ki, bəzi şəxslər Qrinspanı hazırkı baş katib Antonio Quterreşin qeyri-rəsmi dəstəyindən yararlanan namizəd kimi qiymətləndirirlər. Bununla belə, əsas məsələnin namizədə qarşı səslərin mənbəyi olduğu vurğulanıb. Əgər bu səslər Rusiya, Çin və ya ABŞ-dən gəlirsə, çıxılmaz vəziyyət yarana bilər.

Quterreşin ikinci və sonuncu səlahiyyət müddəti 31 dekabr 2026-cı ildə başa çatacaq. Qeyri-rəsmi regional rotasiya sisteminə əsasən, onun varisi Latın Amerikasından olan nümayəndə olmalıdır. Qrinspan seçilərsə, BMT-nin ilk qadın və ilk yəhudi baş katibi olacaq.

Nəşrin yazdığına görə, Qrinspanın valideynləri Polşadan Mərkəzi Amerikaya köçüblər. Onun ana tərəfdən nənəsi və babası nasistlər tərəfindən öldürülüb. Hazırda Qrinspan BMT-nin Ticarət və İnkişaf üzrə Konfransına (UNCTAD) rəhbərlik edir. Seçki prosesinin oktyabr ayında başa çatacağı gözlənilir.