Bugünkü müzakirələr göstərdi ki, Yeni Şəhər Gündəliyi hələ də çox aktualdır. Bu, şəhərlərdəki əsas problemlərin həlli üçün vacib çərçivə rolunu oynayır. Bunlara bərabərsizlik, mənzil çatışmazlığı, qeyri-formal yaşayış, iqlim riskləri, infrastruktur problemləri və məcburi köç daxildir.

“İki sahil” xəbər verir ki, bu sözləri BMT-nin Məskunlaşma Proqramının (UN-Habitat) Qlobal Həllər Bölməsinin direktoru Rafael Tuts Yeni Şəhər Gündəliyi üzrə Nazirlər Görüşünün yekununda deyib.

R.Tuts qeyd edib ki, qarşıdakı dövrdə əsas diqqət icraya yönəldilməlidir: “Adekvat mənzil şəhər inkişafının mərkəzində olmalıdır. Mənzil siyasəti torpaq, xidmətlər, nəqliyyat, iş yerləri, ictimai məkanlar, maliyyə və iqlim məsələləri ilə birlikdə düşünülməlidir. Uğurlu nəticələr üçün güclü idarəetmə, sabit maliyyə, yerli imkanlar, tərəfdaşlıq və keyfiyyətli məlumatlar vacibdir. Bu görüş tək bir tədbir deyil, Bakıdan Nyu-Yorkadək davam edən prosesin bir hissəsidir. Bu yol Dünya Şəhər Forumundan BMT Baş Assambleyasının iyul ayında keçiriləcək yüksək səviyyəli iclasına aparır”.

Onun sözlərinə görə, bugünkü müzakirələr gələcək hesabatların və görüşlərin hazırlanmasına töhfə verəcək: “Yeni Şəhər Gündəliyinin icrası yalnız dövlətlərin deyil, bütün tərəfdaşların birgə işi ilə mümkündür. Hökumətlər, yerli qurumlar, icmalar, özəl sektor və beynəlxalq təşkilatlar birlikdə çalışmalıdır. Məqsəd bu müzakirələri davam etdirmək və konkret nəticələrə çevirməkdir. Yeni Şəhər Gündəliyinin bu mərhələsi həm qiymətləndirmə, həm də daha sürətli icraya keçid üçün bir fürsətdir”.