Şərqi Anadoluda güclü yağış və qar ehtimalı səbəbindən 14 vilayətdə sarı xəbərdarlıq elan edilib.

“İki sahil” Türkiyə Meteorologiya Baş İdarəsinə istinadən xəbər verir ki, Anadolunun bir sıra bölgəsində əsasən ildırım ilə leysan şəklində yağıntı gözlənilir.

Ölkə ərazisində havanın temperaturunun normadan aşağı olacağı proqnozlaşdırılır.

Bingöl, Bitlis, Diyarbəkir, Ərzincan, Ərzurum, Hatay, Muş, Siirt, Van, Bayburt, Batman, Şırnak, Ərdahan və Osmaniyə vilayətlərində intensiv yağıntı, bəzi yerlərdə qar yağacağı gözlənilir.

Şərqi Anadolunun bəzi ərazilərində qar uçqunları və qar əriməsi riski qalmaqdadır.

Hakimiyyət orqanları yol-nəqliyyat hadisələri riskinin yüksək olması səbəbindən vətəndaşları mümkün olduqda şəxsi nəqliyyat vasitələrində yola çıxmaqdan çəkinməyə çağırıb.