Moldova Azərbaycanlıları Konqresi (MAK) Kişineu şəhər meriyası tərəfindən təşkil edilən ekoloji tədbirdə iştirak edib.

“İki sahil” xəbər verir ki, tədbir paytaxtın Mərkəzi Parkında – İsa Məsihin Zühuru Kafedralının yaxınlığında baş tutub. Burada Etnoslar xiyabanının təntənəli təməlqoyma mərasimi olub.

Təşəbbüs Kişineu şəhərinin etnik icmalarının nümayəndələrini bir araya gətirib. Tədbirin bir hissəsi olaraq, hər bir etnomədəni təşkilat bir ağac əkib və üzərində öz adları yazılmış lövhə yerləşdirib. Gələcəkdə daimi xatirə lövhələrinin qoyulması planlaşdırılır ki, bu da xiyabana mədəniyyətlərarası dialoqun rəmzi kimi xüsusi əhəmiyyət verir.

Kişineu meri İon Çeban ailəsi ilə birlikdə mərasimdə iştirak edərək tədbirə səmimi və birləşdirici bir ab-hava qatıb.

Moldova Azərbaycanlıları Konqresini onun sədri Elçin Bayramov, MAK Şurasının sədri Ramil Adıgözəlov, Şura üzvü Rəhim Səfərov və icma ağsaqqalı Marif Rəhimov təmsil edirdilər.

“Etnoslar xiyabanının yaradılması sadəcə simvolik bir jest deyil, ölkəmizdə yaşayan xalqlar arasında qarşılıqlı anlaşma və etimadın möhkəmləndirilməsinə mühüm töhfədir. İnsanları ortaq dəyərlər - hörmət, sülh və əməkdaşlıq ətrafında birləşdirən bu gözəl təşəbbüsün bir hissəsi olmaqdan şərəf duyuruq”, - deyə Elçin Bayramov qeyd edib.

MAK-ın bu tədbirdə iştirakı Azərbaycan icmasının sosial həmrəylik, millətlərarası əməkdaşlıq prinsiplərinə sadiqliyini və Moldova Respublikasının çoxmillətli cəmiyyətinin inkişafına fəal töhfə verdiyini vurğulayır.