Çərşənbə günü İspaniya Barselonada evtanaziya işi ilə bağlı aparılan araşdırmaya görə ABŞ hökumətini kəskin tənqid edib. Bu isə insan hüquqları və həyatın dayandırılması ilə bağlı qanunvericilik məsələləri ətrafında diplomatik gərginlik yaradıb.
“İki sahil” xəbər verir ki, ABŞ-ın Madriddəki səfirliyinə göndərilmiş diplomatik teleqramın mətbuata sızması münaqişəyə səbəb olub. Həmin teleqramda ABŞ-ın Madriddəki səfirliyinə İspaniyada iflic vəziyyətdə olan Noeliya Kastilyoya ötən həftə qanuni evtanaziyanın tətbiqinə icazə verilməsi ilə bağlı qərarın araşdırılmasına başlanılması tapşırılıb.
25 yaşlı qadın 2021-ci ildə qəbul edilmiş İspaniyanın “Ölmək hüququ haqqında” qanunu çərçivəsində evtanaziya üçün icazə almaq məqsədilə müraciət edib.
Mətbuata sızan teleqramda ABŞ Dövlət Departamentinin nümayəndələri İspaniyada evtanaziya ilə bağlı qanunun “psixi pozuntular və ölümcül olmayan əzablarla bağlı hallarda” tətbiqindən narahat olduqlarını bildiriblər və diplomatlarına Vaşinqtonun “ciddi narahatlığını” ispaniyalı həmkarlarına çatdırmağı tapşırıblar.
Diplomatik araşdırma ilə bağlı xəbər İspaniyanın səhiyyə naziri Monika Qarsia tərəfindən narazılıqla qarşılanıb. O, ABŞ Prezidenti Donald Trampı İspaniyanın daxili işlərinə qarışmamağa çağırıb.
Qarsia, həmçinin Vaşinqtonu bir ispan vətəndaşının ölümü ilə bağlı məsələyə maraq göstərdiyinə görə tənqid edib və vurğulayıb ki, ABŞ-da hər il “sığorta olunmamış minlərlə insan ölür”.
