ABŞ-nin vitse-prezidenti Cey Di Vens son günlərdə İrana qarşı müharibə məsələsi ilə bağlı Pakistandan olan vasitəçilərlə əlaqələr saxlayıb.

“İki sahil” xəbər verir ki, bu barədə "Reuters" mənbəyə istinadən bildirib.

ABŞ Prezidenti Donald Trampın tapşırığına əsasən, Vens bildirib ki, ölkə lideri Vaşinqtonun bir sıra tələblərinin yerinə yetirilməsi, xüsusən də Hörmüz boğazının fəaliyyətinin bərpası şərtilə atəşkəsə açıqdır.

Vens, həmçinin Trampın səbrinin tükəndiyinə dair sərt mesaj çatdırıb və razılaşmadan imtina ediləcəyi təqdirdə İranın infrastrukturuna zərbələrin gücləndirilə biləcəyi barədə xəbərdarlıq edib.

Agentlik qeyd edib ki, ABŞ vitse-prezidenti artıq beşinci həftədir ki, davam edən müharibənin dayandırılması barədə razılığa gəlmək cəhdlərində daha əhəmiyyətli bir rolu öz üzərinə götürüb. Məqalədə vurğulanıb ki, 2028-ci il prezident seçkisində Trampın potensial xələfi kimi nəzərdən keçirilən Vens münaqişəyə münasibətdə ehtiyatlı mövqe tutub, bu da onun ABŞ-nin xaricdəki hərbi əməliyyatlarda uzunmüddətli iştirakına dair çoxdankı skeptisizmini əks etdirir.

Xatırladaq ki, Tramp Tehranla razılaşma əldə etmək ümidi ilə İranın kritik əhəmiyyətli infrastrukturuna zərbələri aprelin 6-dək təxirə salıb.