Almaniyanın qərbindəki Solingen şəhərində (Şimali Reyn-Vestfaliya) baş verən bıçaqlı hücum nəticəsində bir neçə nəfər yaralanıb.

“İki sahil” yazır ki, bu barədə “Bild” qəzeti məlumat yayıb.

Qəzetin məlumatına görə, hazırda şəhər mərkəzində genişmiqyaslı polis əməliyyatı aparılır.

Bildirilir ki, bir neçə nəfər yaralanıb. Qanlı bıçaq hələ də küçədədir. Bir nəfərin saxlanıldığı deyilir. Solingenin mərkəzində dəqiq nə baş verdiyi hələ də məlum deyil. Əməliyyatda bir neçə polis bölməsi iştirak edir.

“Bild”in yazdığına görə, hazırda hüquq-mühafizə orqanları hadisəni kütləvi qətl və ya terror aktı kimi təsnif etmir. İddialara görə, üç nəfərin iştirak etdiyi münaqişə baş verib. Hər üçü saxlanılıb. İştirakçılardan birinin sinəsindən bir neçə bıçaq yarası aldığı bildirilir. Digər ikisi isə yüngül xəsarət alıb. Qəzetin məlumatına görə, iki nəfər mübahisə etməyə başlayıb, üçüncüsü isə mübahisəni dayandırmağa çalışıb və yaralanıb. Bild xəbər verir ki, hadisənin iştirakçıları, görünür, iki Türkiyə vətəndaşı və bir türk əsilli alman olub.

Solinger Tageblatt qəzetinin məlumatına görə, Konrad-Adenauer-Ştrasse küçəsində polis əməliyyatı aparılır. Polisin hərəkəti səbəbindən genişmiqyaslı nəqliyyat məhdudiyyətləri tətbiq edilib. Sürücülərə və piyadalara ərazidən uzaq durmaq tövsiyə olunur.

Məhərrəm Ağalaroğlu, “İki sahil”