Bir çox insanlar üçün səhər oyandıqdan dərhal sonra yatağı yığışdırmaq nizam-intizamın və təmizliyin göstəricisi hesab olunur. Lakin mütəxəssislər bildiriblər ki, yatağı oyandıqdan dərhal sonra yığmaq sağlamlıq baxımından hər zaman doğru seçim olmaya bilər. Aparılan son araşdırmalara görə, yatağın havalanmasına imkan verilmədikdə toz gənələrinin çoxalması üçün daha əlverişli mühit yarana bilər.

Yuxu mütəxəssisi və “MattressNextDay” şirkətinin baş icraçı direktoru Martin Seeley bu mövzuda maraqlı açıqlamalar verib. Onun sözlərinə görə, aparılan bir sıra araşdırmalar yatağın dərhal yığılmasının havalandırmanı məhdudlaşdırdığını göstərir. Bu isə toz gənələrinin və allergiyaya səbəb ola bilən zülalların daha çox toplandığı bir mühit yarada bilər.

Gecə ərzində yaranan rütubət risk yaradır

Mütəxəssis qeyd edib ki, toz gənələri xüsusilə rütubətli və isti mühitlərdə daha sürətlə çoxalır. İnsan bədəni isə gecə ərzində müəyyən miqdarda tərlədiyi üçün yataqda rütubətli mühit yaranır. Orta hesabla bir insan gecə ərzində təxminən 500 millilitrə qədər tər ifraz edə bilər. Bu da yatağın içərisində nəmli şərait formalaşdıraraq toz gənələrinin çoxalmasını asanlaşdıra bilər.

Yatağın bir müddət havalanmasına imkan verin

Mütəxəssislər oyandıqdan sonra yatağı dərhal yığışdırmaq əvəzinə bir müddət açıq vəziyyətdə saxlamağı tövsiyə ediblər. Bu zaman yataq dəstinin hava alması və rütubətin azalması mümkün olur. Eyni zamanda, günəş şüalarının yatağa düşməsi də bu baxımdan faydalı hesab edilir. Günəş işığı təbii dezinfeksiyaedici təsirə malikdir və bəzi bakteriya və gənələrin azalmasına kömək edə bilər.

Allergiya və astma riskini artırır

Toz gənələri çox vaxt gözlə görünməsə də, bəzi insanlar üçün ciddi allergik reaksiyalara səbəb ola bilər. Araşdırmalara görə, dünya əhalisinin təxminən 10 faizi toz gənələrinə qarşı allergiyaya malikdir. Bu mikroorqanizmlər, eyni zamanda, astma xəstəliyinin şiddətlənməsinə də təsir göstərə bilər. Bu səbəbdən mütəxəssislər yatağın gündəlik olaraq havalandırılmasını və yataq otağında rütubət səviyyəsinin nəzarətdə saxlanmasını tövsiyə ediblər. Oyandıqdan sonra yatağı dərhal yığışdırmaq əvəzinə bir qədər gözləmək isə yatağın daha yaxşı qurumasına və gigiyenik vəziyyətinin qorunmasına kömək edə bilər.

Şahnigar Əhmədova, “İki sahil”