Macarıstanın neft-qaz şirkəti MOL Rusiyadan neftin dəniz yolu ilə Xorvatiya üzərindən idxalı üçün ilk müqavilələri imzalayıb.

“İki sahil” xəbər verir ki, bu barədə Macarıstanın xarici işlər və xarici iqtisadi əlaqələr naziri Peter Siyarto məlumat verib.

Nazirin sözlərinə görə, sifariş edilən ilk partiya artıq yoldadır. Yükün mart ayının əvvəlində Xorvatiyanın Omişal limanına çatacağı gözlənilir. Oradan isə 5–10 gün ərzində neft Macarıstan və Slovakiyadakı neft emalı zavodlarına nəql olunacaq.

Yanvarın 27-də Rusiya neftinin Macarıstan və Slovakiyaya Drujba boru kəməri vasitəsilə tədarükü dayandırılıb. Bundan sonra hər iki ölkə Xorvatiyaya müraciət edərək xammalın Adria boru kəməri ilə nəqlinə şərait yaradılmasını istəyib. Planlaşdırılır ki, Rusiya nefti əvvəlcə dəniz yolu ilə Omişal limanına çatdırılacaq, daha sonra isə boru kəməri vasitəsilə Mərkəzi Avropaya ötürüləcək.

Peter Siyarto bildirib ki, Ukrayna tranzitin bərpasından “siyasi səbəblərə görə” imtina edir. Rusiya tərəfi isə vəziyyəti “enerji şantajı” kimi qiymətləndirib. Eyni zamanda, Avropa Komissiyası Macarıstanın neft idxalı üçün alternativ variantların axtarışına hazır olduğunu açıqlayıb.