Britaniyada aparılan sorğu nəticəsində məlum olub ki, gənclərin demək olar ki, yarısı artıq internetsiz bir zamanda yaşamağa üstünlük verir. Hollandiyadan olan bir startap oflayn görüşlər təşkil etməklə belə insanları birləşdirməyə çalışır.
Yeni bir araşdırmaya görə, gənclərin demək olar ki, yarısı onlayn istifadə üçün məhdudiyyətlər istəyir.
“Offline Club” Instagram hesabının təxminən 530 min izləyicisi var. Bu, demək olar ki, istehzalı görünür, çünki “The Offline Club” sosial mediadan, o cümlədən Instagramdan şüurlu bir fasiləNİ əşviq edir.
"Ekran vaxtını real vaxta dəyişdirin" şüarı şirkətin üç holland qurucusu İlya Kneppelhout, Kordivan Bennekom və Valentin Klok tərəfindən istifadə olunur.
Son bir il ərzində onlar smartfon və noutbuklara icazə verilməyən görüşlər təşkil ediblər.
Göründüyü kimi, getdikcə daha çox insan ən azı bu təşkil edilən tədbirlərə görə mobil telefonlarını söndürməyə hazırdır.
İnsanlar smartfonlarını çıxarmaq əvəzinə kitab oxuyur, oyun oynayır, sənətkarlıq və rəsmlə məşğul olur və ya bir neçə saat dincəlirlər. “Digital Detox Retreats” adlı seminarlar isə bir neçə gün çəkir.
"Biz telefonsuz məkanların və oflayn icmaların normaya çevrildiyi bir dünya təsəvvür edirik",-deyə üç təsisçi öz saytında yazıb.
Hollandiya konsepsiyası son bir il ərzində bütün dünyaya yayılmaqdadır. Amsterdam ilk yerlərdən biri idi, sonra London, Paris, Milan və Kopenhagen başladı.
Bu nəticələr 2024-cü ilin sonlarında Amerika sorğu institutu olan “Harris Polls” kimi digər sorğularla üst-üstə düşür. Həmin sorğuda bir çox gənc TikTok, Instagram və ya X-in heç vaxt icad edilməməsini arzulayırdı.
Siyasi müdafiə
Çərşənbə axşamı Böyük Britaniyanın Texnologiya naziri Piter Kayl məcburi komendant saatlarının nəzərdən keçirilməsinə işarə edib, “The Guardian” qəzeti yazır.
Norveç sosial mediadan istifadə üçün yaş həddini 13-dən 15-ə qaldırmaq istəyir.
Qlobal bir pioner kimi Avstraliya artıq 2024-cü ilin sonlarında yaş həddini 16-ya qaldırıb. Danimarka kimi digər ölkələr planşet və smartfonları demək olar ki, birbaşa məktəb həyətindən qadağan edir.
Avstraliya 16 yaşından kiçik uşaqlara sosial mediaya qadağa qoyub.
Smartfondan istifadənin zərərli təsirləri
Həddindən artıq smartfon istifadəsi depressiya, narahatlıq, stress, yuxu pozğunluğu və asılılıq davranışı kimi müxtəlif psixi sağlamlıq problemləri ilə əlaqələndirilir.
Bu ilin əvvəlində “BMC Medicine” jurnalında dərc edilən bir araşdırma üç həftəlik smartfon istifadəsinin azaldılmasından sonra depressiya əlamətlərinin 27% azaldığını göstərdi.
İqtisadi Əməkdaşlıq və İnkişaf Təşkilatının məlumatına görə, son 15 ildə gənclərin psixi sağlamlığı kəskin şəkildə pisləşib. Bu tendensiya rəqəmsal medianın getdikcə daha çox istifadə edildiyi COVID-19 pandemiyası ilə daha da kəskinləşdi. Bununla belə, təşkilat onu da açıqlayıb ki, tədqiqatlar bu iki amil arasında birbaşa səbəb əlaqəsini hələ sübut edə bilməyib.
Digər tərəfdən, Hollandiya Offline Klubunun təsisçiləri hərəkətə keçmək və görüşlərini genişləndirmək istəyirlər. Müxtəlif şəhərlərdə oflayn tədbirlər getdikcə daha çox baş verəcək.
Aprelin əvvəlində Londonda 1000-dən çox insan cib telefonlarını söndürüb xoşbəxtliklə kamera qarşısına keçmişdilər. Bu, yeni bir rekorddur. Oflayn həyata keçənləri əlbəttə ki, İnstaqramda qürurla elan etdilər.
Nubar Süleymanova, “İki sahil”
