Ermənistanı silahlandıran tərəfdaşları zamanı gələndə Paşinyanı meydanda tək qoyacaq

Ermənistanı silahlandıran, yeni təxribatlara çəkən, əlində alət edən Qərb dairələri kritik və həlledici məqamda bu dövlətin arxasından çəkiləcək. Biz əvvəlki illərdə Qərbin bu ikiüzlü siyasətinin acı nəticələrini, dünyanın bir çox ölkələrini hansı faciələrlə üz-üzə qoyduğunu çox yaxşı görmüşük.

“İki sahil” xəbər verir ki, bu fikirləri ARB 24 telekanalına müsahibəsində Trend BİA-nın direktor müavini, siyasi şərhçi Sahil Kərimli bildirib.

O əlavə edib ki, bu gün Ermənistanla strateji tərəfdaşlıq sazişi imzalayan ABŞ, İrəvana silah satan Avropa İttifaqı çətin durumda Paşinyan hakimiyyətini tək qoyacaq:

"Təəssüf ki, Azərbaycanın sülh təkliflərini geri çevirən Ermənistan okeanın o tayında özünə tərəfdaş axtarır. Əlbəttə ki, bütün bunlar həm də Ermənistan hakimiyyətinin işğalçı, qeyri-konstruktiv siyasi mahiyətini ortaya qoyur. Ermənistanın güvəndiyi heç bir ölkə zamanı gələndə regiona gəlib onun yerinə döyüşməyəcək. Əgər Ermənistan bu dairələrin diqtəsi ilə bölgədə yeni hərbi təhdidlər yaradarsa, heç şübhəsiz Azərbaycanın qüdrətli hərbi gücü ilə qarşılaşacaq, meydanda tək qalaraq məhv olacaq".