Amerika ödənişli televiziya şəbəkəsi Home Box Office (HBO) şirkətinin yaradıcısı Çarlz Dolan 98 yaşında vəfat edib.

“İki sahil” "Kommersant"a istinadla xəbər veri ki, HBO-dan əlavə, Dolan Nyu-Yorkda aparıcı ödənişli televiziya operatoru olan Cablevision-ı təsis edib.

Çarlz Dolanın ailəsinin sözçüsü Wall Street Journal-a bildirib ki, iş adamı yaxınlarının əhatəsində təbii səbəblərdən dünyasını dəyişib.

Çarlz Dolan 1926-cı ildə Klivlenddə anadan olub. Onun ilk peşəkar karyerası həyat yoldaşı ilə birlikdə istehsal etdiyi idman filmlərinin qablaşdırılması, marketinqi və yayılması olub. 1960-cı illərin əvvəllərində o, Nyu-Yorka köçüb və şəhərdəki otellərə kabel rabitəsi xidmətləri göstərən Teleguide Inc şirkətini qurub. Tezliklə şəhərin ilk kabel televiziyası olan Sterling Manhattan Cable yaradılıb.

1972-ci ildə HBO-nu qurub. Time-Life, Inc.-ə (indiki Time Warner) satıldıqdan sonra Cablevision Korporasiyasını təşkil edib. 2016-cı ildə o, Cablevision-ı 17,7 milyard dollara satıb. Forbes-in məlumatına görə, Dolan ailəsinin sərvəti təxminən 5,4 milyard dollardır. Onun həyat yoldaşı Helen Ann Dolan 2023-cü ildə vəfat edib.