Nayabrın 1-də Yeni Azərbaycan Partiyası Sumqayıt şəhər təşkilatının təşəbbüsü ilə "Yaşıl dünya naminə həmrəylik ili" ilə əlaqədar silsilə tədbirlər çərçivəsində növbəti toplantı Sumqayıt şəhər 6-cı mikrorayon ərazi partiya təşkilatında keçirildi.

“İki sahil” xəbər verir ki, Sumqayıt şəhəri 6-cı mikrorayon, Z. Hacıyev 79 ünvanında yerləşən 27 №li tam orta məktəbdə təşkil olunan tədbirdə Yeni Azərbaycan Partiyası Sumqayıt şəhər təşkilatının sədr müavini Cavid Məmiyev, 27 №li məktəbin direktoru partiya fəalı Valid Mustafayev, ideoloji məsələlər üzrə məsləhətçi Elvin Əlizadə və ərazi partiya təşkilatının digər üzvləri iştirak etdilər.

Tədbiri giriş sözü ilə açan Yeni Azərbaycan Partiyası Sumqayıt şəhər təşkilatının sədr müavini Cavid Məmiyev qeyd etdi ki, son 20 ildə Azərbaycan Respublikası Müzəffər Ali Baş Komandan Cənab İlham Əliyevin rəhbərliyi altında çox mühüm tarixi uğurlara imza atmış, eyni zamanda ölkəmiz beynəlxalq və regional əhəmiyyətli çoxsaylı tədbirlərə ev sahibliyi etmişdir. Həm ölkəmizin paytaxtı Bakı şəhərində, həm digər regionlarımızda keçirilən tədbirlərdə yüksək səviyyəli təşkilatçılıq təmin olunmuşdur. Dünya dövlətləri tərəfindən COP29 konfransının Azərbaycanda, Bakıda keçirilməsinə razılıq verilməsi ölkəmiz adına əlamətdar hadisədir. COP29-un Azərbaycanda keçirilməsi ölkəmizə bir çox aspektlərdə: siyasət, iqtisadiyyat, turizm, investisiya və regional liderlik də daxil olmaqla bir çox sahələrə töhfə verəcəyi gözlənilir. Bu Azərbaycan dövlətinin və Azərbaycan Respublikasının Prezidenti Cənab İlham Əliyevin beynəlxalq aləmdə yüksək nüfuza malik olmasının bariz göstəricisidir.

Daha sonra çıxış edən Valid Mustafayev bildirdi ki, təqribən, 70-80 min xarici qonaq müəyyən müddət ərzində ölkəmizdə olacaq. COP29 dünyada ən mötəbər beynəlxalq tədbirlərdən biridir. Ölkələrin təmsilçiliyi nöqteyi-nəzərindən BMT Baş Assambleyasından geri qalmır.

Daha sonra çıxış edən natiqlər də COP29-un ölkəmiz adına çox mühüm əhəmiyyətini xüsusi qeyd etdilər.